تحدث أسامة حسني عبر قناة النادي الأهلي عن الفضيحة التحكيمية التي حدثت خلال مباراة النادي الأهلي ضد سيراميكا كيلوباترا وعدم احتساب ركلة جزاء واضحة للاحمر وتعنت الحكم.
وقال أسامة حسني:" اتعملنا علشان نتكلم في الفنيات ونتكلم في الكورة، لكن اللي شفناه في مباراة الأهلي ضد سيراميكا دي فضيحة تحكيمية تليق بالبهاوات والبشوات اللي بيديروا الكورة في مصر. شايفين المنظر، شايفين الفساد اللي بيحصل في الكورة عندنا، شايفين الحلاوة دي... آه، الحاجة الحلوة اللي بتتعمل في الكورة في مصر".
وتابع:" محمود عاشور أحسن حكم فار موجود مش في مصر، ده في العالم ، بيجيب حكم المباراة اللي هو الأخ محمود وفا، في ضربة جزاء صحيحة مليون في المية للنادي الأهلي، حكم المباراة يروح ويشوف ويراجع تمثيلية ؟مسلسل؟ فضيحة تحكيمية! ضربة جزاء صحيحة مليون في المية للنادي الأهلي، في وقت النادي الأهلي تتحسب له ضربة جزاء، يفوز بالمباراة وينافس على بطولة الدوري بقوة".
وأكمل:" لكن من الواضح إن في ناس مش حابة النادي الأهلي يكون بطل الدوري، في ناس متربصة بالنادي الأهلي ، لما كورة زي دي متتحسبش ضربة جزاء من حكم المباراة محمود وفا، شفتوا فساد ولا بلطجة ولا فضيحة؟ قولوا زي ما إنتوا عايزين تقولوا في لعبة زي دي وكورة ماتتحسبش؟ شايفين اللعبة، شايفين الكورة، شايفين الفساد. وبنتكلم على منافسة في الكورة في مصر وفي الدوري الممتاز؟ الحكم قدام الكورة بكام متر شايفها، وحكم الفار جابها. تعمد؟ يا ترى الأخ اللي نازل يحكم المباراة واخد تعليمات من مين علشان يعطل النادي الأهلي؟ ولصالح مين؟ عايزين تاخدوا الدوري علشان تدوه لفرقة تانية؟ دي هي المنافسة في مصر؟ ودي هي الكورة في مصر؟ فضيحة تحكيمية قدام عيون العالم كله"
وأردف:" فضيحة تحكيمية تليق بالأخوة والبهاوات والبشوات اللي بيديروا الكورة في مصر ، حكم من منطقة كفر الشيخ وتحط تحت كفر الشيخ دي مليون خط، أنا مش هقول، مش هقول مين اللي بيعين الحكام في مباريات الأهلي ومين اللي عايز يعطل النادي الأهلي ، لما يبقى الشكل كدة، كابتن محمود عاشور أحسن واحد، مش هقول لكم في مصر، ده من أفضل الحكام بتصنيف الفيفا الموجودين في العالم اللي موجود على الفار، شايف اللعبة، جاب حكم المباراة وعدَّها له من كذا زاوية، وشايف إن إيد اللاعب مكبَّرة جسمه، مافيش بعد كده، تاني إيد اللاعب مكبَّرة جسمه وفاتح إيده والكورة رايحة ولمست إيده وضربة جزاء. لكن حكم المباراة بتاع اللي مات قبل المباراة دي مش ضربة جزاء؟".
وأزاد:" وتقولوا لنا نتكلم عن فنيات ونتكلم عن منافسة ونتكلم عن بطولة دوري، واحنا في مرحلة حاسمة في بطولة الدوري؟ والله حاجة تكسف، حاجة تكسف، وحاجة تقرف، وبقت الرياضة في مصر شبه الفساد اللي إحنا شايفينه ده، للأسف بقت في كل حاجة".