أكد أحمد حسام ميدو، لاعب الزمالك السابق، أن نجاح فريق نابولي في المنافسة على لقب الدوري الإيطالي رغم الرواتب المتواضعة للاعبيه، يمثل نموذجًا يحتذى به للأندية المصرية، مشيرًا إلى أن هناك حاجة ملحة لإعادة تقييم أسعار اللاعبين المحليين بشكل احترافي.

وقال ميدو، خلال ظهوره الإعلامي:"رجعت لتحليل الهيكل المالي لفريق نابولي، ولقيت إن 14 لاعبًا في الفريق بياخدوا أقل من مليون يورو سنويًا بعد الضرائب، ورغم كده الفريق مرشح بنسبة تفوق 90% للفوز بالاسكوديتو".

وأضاف:"في مصر السنة الجاية، وارد نشوف الأهلي والزمالك وبيراميدز عند كل واحد منهم 7 لاعيبة أو أكتر، بياخدوا أكتر من مليون يورو سنويًا، والسؤال هنا: هل فعلاً قيمة اللاعبين دي تستحق الأرقام دي؟".

وتابع ميدو:"إحنا في حاجة لناس محترفة تقوم بتقييم اللاعبين، زي ما بيحصل في أمريكا وإنجلترا، هناك في وظيفة اسمها (المقيّم الرياضي)، وده شغله الأساسي تحديد القيمة السوقية العادلة لأي لاعب بناءً على معايير فنية وبدنية وإحصائية دقيقة".

وأوضح:"زي ما بتدخل معرض عربيات وتلاقي سيارة تمنها محدد بناءً على مواصفاتها، لازم يكون في معيار واضح يحدد قيمة اللاعب في مصر. لكن حاليًا، محدش فاهم إزاي بيتم تقييم اللاعبين، والأسعار أصبحت عشوائية".

واختتم ميدو:"أنا مش ضد إن اللاعب ياخد حقه، وإحنا كلنا الحمد لله ربنا كرمنا من الكورة، لكن لازم يكون في منطق وعدالة في السوق، ومش معقول كل لاعب يتسعر من غير معيار واضح".