دافع أحمد شوبير حارس الأهلي الأسبق عن مدرب الزمالك الجديد أيمن الرمادي وذلك بعد حملات النقد الأخيرة بسبب عدم تولي ابن من أبناء الزمالك الفريق ووجود مدرب محلي غير مصري لقيادة الأبيض.
وقال الإعلامي أحمد شوبير حارس الأهلي الأسبق ومنتخب مصر عبر اون سبورت اف ام: "خليني بس اتكلم في شوية تابوهات كده موجودة عندنا انا بستغربها شوفت امبارح البعض بيقولك مش من ابناء نادي الزمالك هو بيسيرو من ابناء نادي الزمالك او جوزيه جوميز ولا كابرال كان من ابناء نادي الزمالك ولا فينجادا".
وتابع: "اصل ده مدرب اجنبي ، طيب محمود الجوهري كان من ابناء نادي الزمالك ،، طيب ابناء نادي الزمالك لما مسكوا ساعدتوا الكابتن حسن شحاتة لما تولي المسئولية ساعدتوا حلمي طولان لما تولي المسئولية ساعدتوا فاروق جعفر لما تولي المسئولية ساعدتوا طارق يحيي لما تولوا المسئولية يا ابناء نادي الزمالك"..
وأكمل: "خلاص في مدرب جيه كلكم تساندوا لو انتوا ابناء نادي الزمالك بجد وعاوزينه يمشي صح بجد ويكسب بجد انت حضرتك تسانده انا هقولكم حاجة انا قولتها قبل كده كذا مرة انا كنت كابتن النادي الاهلي والكابتن جوهري مسك التدريب في نادي الزمالك انا روحتله التدريب في نادي الزمالك واستقبلت استقبال عظيم".
وأكد: "ايه قصة ابناء نادي الزمالك على عيني وعلى راسي وانا قولتلك اسماء عظيمة زي حسن شحاتة وفاروق جعفر وحلمي طولان وافضل اعدلك الاسماء الكتيرة ، وبعدين هو مين الجهاز المعاون مع ايمن الرمادي ما كلهم ابناء نادي الزمالك حازم امام واحمد سمير وعماد المندوه ووائل القباني ومحمد علاء وكل الناس دي ما كلهم ابناء نادي الزمالك.".