تحدث نجم الأهلي السابق سيد معوض عن انتقال نجله عمر إلى فريق ريال بيتيس ودور الأهلي في التفاوض الفترة الأخيرة مع الفريق الأسباني.
وقال سيد معوض في تصريحات تليفزيونية لبرنامج حارس الأهلي الذي يقدمه الإعلامي أحمد شوبير عبر قناة الأهلي: "الحمد لله من اول يوم الناس بصراحة تعاملت بشكل كويس أول ما عمر راح فترة المعايشة هناك وهمه قرروا عاوزين يكملوا الصفقة، وبعد حتى ما عمر اتعور المسئول عن قطاع الناشئين في بيتيس قالي احنا مكملين ومفيش أي مشكلة أي لاعب معرض أنه يتصاب وطبيعي في الكرة، انبسطت جدا بصراحة وحسيت ان هي حاجة كويسة وكملت من بعدها يمكن الموضوع كان مستني شوية لحد ما عمر يوصل 18 سنة".
وأضاف معوض: "وقعنا مع الأهلي على بياض، ارتباطنا بالأهلي مش موضوع عقود، قبل ما عمر يوقع عقد كان فيه اجتماع مع مسئول بيتيس وأمير توفيق لو كان فيه حاجة في دماغي عمر ما كنت هخلي حاجة تتم وأمير توفيق شاهد".
وأضاف معوض: "انا لازم اشكر اتنين، شايفهم مظلومين في السوشيال ميديا السنين اللي فاتت وبأمانة الناس جايه عليهم بس انا شفت فيهم ان هم بيدورا عن حق الأهلي في أي موضوع أو صفقة يتم التفاوض عليه، أمير توفيق وحسام غالي بأمانة من أهم الناس تعاملت معهم بقصة عمر ومن اهم الناس اللي ساعدوا ان النادي ياخد حقوقه كاملة".
وأشار نجم الأهلي السابق: "النادي الأهلي عامل عقد محترم يعني كل شوية النادي هيدخله دخل محترم ويعدي مبلغ كبير كل ما عمر يكون موجود الأهلي هيدخله فلوس كويسة كل 10 مباريات مع الناشئين هيدخل مبلغ للأهلي 100 ألف دولار وعلى مر السنين ونسبة إعادة بيع نسبة عالية جدا والأولوية للأهلي لو فيه تفاوض مع نادي خارجي، كل حاجة النادي الأهلي جزء كبير من العقد لمصلحة الاهلي أولا وبعد كده مصلحة عمر وريال بيتيس".
واختتم معوض حديثه: "النقطة الأهم اننا مبسوطين ان عمر طالع وهو كبير من النادي ، شرف كبير جدا التعامل في الصفقة دي كلها سواء مع كابتن الخطيب أو حسام غالي أو أمير توفيق التلاتة وقفوا معانا وقفة كويسة والحمد لله عمر لحد يناير في النادي ومن اول يناير خلاص موجود هناك ان شاء الله".