تحدث عمر سيد معوض بعد الانتقال لفريق ريال بيتيس الإسباني والذي سيبدأ بشكل رسمي في بداية شهر يناير المقبل بعد فترة متابعة طويلة للاعب الشاب.
وقال عمر معوض في تصريحات تليفزيونية لبرنامج حارس الأهلي الذي يقدمه الإعلامي أحمد شوبير عبر قناة الأهلي: "الحمد لله تمام والعلاج ماشي الحمد لله تمام من كرم ربنا الحمد لله انا تمام وان شاء الله هرجع قريب، ان شاء الله في أول ديسمبر".
وأضاف عمر معوض: "عاوز اشكر كل حد في النادي الاهلي لان كلهم وقفوا في ضهري بالذات في الموضوع ده وفضلوا واقفين معي لحد اخر الموضوع خالص وفضلوا يتكلموا وفضلوا يفاوضوا لحد دلوقتي لحد ما اتبعت الفاكس ونزل الخبر، كلهم وقفوا جنبي والناس كلها اللي في الاهلي سواء مدربين والأجهزة فنية والكباتن كلها وقفت جنبي ولحد ما الموضوع مشي".
وأشار لاعب الأهلي الشاب: "الموضوع برضه اتعقد في النص شوية بسبب حوار الصليبي وأنا اول واحد كنت محبط بعد ما جالي الصليبي، من جوايا كنت محبط وقلت خلاص والموضوع اتلغى، بس سبحان الله ربنا حطلي حاجة أكبر بكتير".
وتابع عمر معوض: "كل اللي في دماغي كمان وقت فترة المعايشة اني كنت عايز اطلع أوريهم أني كنت بلعب في نادي كبير، أكبر نادي في افريقيا النادي ده اللي رباني وعلمني كتير، هاتدرب مع فرقة الشباب بإذن الله ها عمل كل اللي انا أقدر عليه واصعد للفريق الأول وألعب في أسرع وقت".
واختتم عمر معوض تصريحاته: "طموحي ألعب للفريق الأول شرف لي ألعب في ريال بيتيس وكمان كان شرف لي أني كنت جزء من النادي الأهلي، النادي الاهلي هو اللي وداني هناك النادي الاهلي هو اللي ساعدني وبشكر كل الناس اللي وقفت جنبي اولهم جمهور النادي الاهلي بشكرهم واحد واحد، كل الناس اللي فضلت واقفة جنبي وكانت بتسأل عليه وتدعيلي ان الصفقة تتم وأطلع فريق أول بشكر كل الجمهور وبشكر كل الاجهزة الفنية واللعيبة زمايلي وبشكر كل وبشكر من العامل لحد الكابتن محمود الخطيب أنا بشكرهم كلهم على وقفتهم جنبي وانهم فضلوا بضهري".