كشف السويسري مارسيل كولر المدير الفني للفريق الأول لكرة القدم بالنادي الأهلي، عن كواليس مشاركة كريم فؤاد بدلًا من علي معلول في نهائي دوري أبطال إفريقيا أمام الترجي التونسي.

وقال كولر خلال حديثه عبر قناة إم بي سي مصر: "سامي قمصان له فضل في أمر مشاركة كريم فؤاد بدلًا من علي معلول أمام الترجي.. كان قالي قبل الماتش واحنا بنحضر في كل مركز وقالي أن كريم فؤاد لعب موسم كامل ظهير أيسر حتى لو بقاله فترة مش بيلعبها وأنا من ساعة ما جيت بحب ألاعب كريم قدام ولاعبته كذا ماتش جناح وبعد كدة للأسف جاله صليبي وغاب فترة طويلة".

وأضاف: "كان موقف صعب في ماتش الذهاب والأجواء دي وخصوصا أن علي اتصاب بعد 5 دقايق بالظبط ومحتاج يتغير لازم تبقى جاهز ومحضر نفسك فقولت لكريم اجهز والحاجة الصعبة أن كريم كان طول المحاضرات اللي قبلها مركز على مكانه هو جناح يمين فمش بيبقى مركز أوي في المحاضرة عن الواجبات بتاعت المراكز التانية".

واختتم كولر حديثه: "لكن كريم كان عنده قوة ذهنية عظيمة جدا لأنه بينزل في الوقت ده وبيلعب في مكان تاني وبيأدي فيه وده الموقف اللي بتقرر فيه كمدرب أن كريم فؤاد عنده خبرات كبيرة لكن كريم الدبيس ممكن مع الأجواء دي وفي ظروف الماتش ممكن تخلص عليه وممكن يكسر الدنيا لكن أنا ماكنتش عاوز احطه تحت ضغط مرضتش اعمل فيه كدة".