الفشل المتوالي لمجلس إدارة الزمالك في جميع الملفات جعل محاولاتهم لإلهاء جماهير الأبيض أكبر من محاولات توضيح الأسباب الحقيقة، وبعد خسارة الفريق السوبر المصري أمام الأهلي أشعلوا أزمة عدم مصافحة زيزو لهشام نصر نائب رئيس الزمالك عبر كل المنصات الرسمية للنادي.

وظهر هشام نصر على الهواء عبر شاشة المحور ليسهب في الحديث عن الواقعة مع خالد الغندور: "الأعراف الدولية والنُظم فيها بروتوكول لمراسم تسليم الجوائز بصفة عامة، فمش رغبة شخصية يعني، لكنه تنظيم للبروتوكول، في حالة عدم احترام البروتوكول وعدم الالتزام بتعليماته المعروفة، هل لدى اتحاد كرة القدم لائحة تعاقب هذه الأفعال الصغيرة التي يفعلها الصغار ولا لأ؟.".

وتساءل هشام نصر: " الاتحاد المحترم بتاريخه كله، كرة اليد، فيه لائحة واضحة جدًا، لدرجة إن اللاعب لو قلع الميدالية بعد ما يلبسها وهو قدام المنصة، يتعاقب هو والنادي بتاعه، لأن النادي هو اللي بيوجه تصرفات اللاعبين. لو إنت ما التزمتش بالبروتوكول ده، هل في حد وجّهك إن ده غلط؟ طب لو ما حدش وجّهك، هل الاتحاد هيكون له رأي في الموضوع ده ولا لأ؟ ولا كل واحد ياخد حقه بنفسه؟."

وأشار نائب رئيس الزمالك: "لو ما فيش عقوبة رادعة تحصل للتصرفات الصغيرة، أروح أنا (مش أنا شخصيًا يعني) أو لاعب آخر ما يطلعش يسلم خالص، أو حد من المنصة يسيب المنصة وينزل، أو يرمي الميداليات في وش الناس، هل ده التصرف اللي الدولة عاوزاه؟ لكن بروتوكول الأندية هو اللي بيتحكم. هل يقبل هذا التصرف أو رد الفعل؟ طالما لحد دلوقتي مش عارفين فيه لائحة ولا لأ، طب لو مش عامل لائحة، المباراة الجاية إحنا مش هنسلم على اللاعيبة."

وعن لجوء الزمالك إلى لجنة الإنضباط ضد زيزو فأكد هشام نصر: " المفروض ده يتم تلقائي بدون ما نادي الزمالك يعمل شكوى. ليه؟ هو أنا لو ما عملتش شكوى، يبقى الاتحاد موافق على التصرف ده؟ من غير شكوى؟."

وتابع هشام نصر حديثه: "مين اللي بيسلّم على مين؟ اللاعب هو اللي بيسلّم على المنصّة، تحسّبًا من شخصيته، ما رفعتش إيدي للسلام عليه. اللوم على صديقي وأخي خالد مرتجي قلت له: "اللاعب ده ما عندوش أدب"، والغريب إنه قال لي: "ليك حق" يبقى تاني يوم ينزل صورته في نفس الموقف صورتين مش صورة واحدة إيه يا خالد اللي انت بتعمله ده؟ إحنا أكبر من كده بكتير أوي، وانت عارف طريقتي وأسلوبى".

واختتم هشام نصر هجومه على مرتجي: "ليه يا جماعة بتجرّونا للمنطقة دي؟ بدل ما توجّه اللوم، خصوصًا إن الكابتن خالد مرتجي حصل معاه السنة اللي فاتت نفس الموقف من إحدى لاعبات الطائرة، قوم الدنيا وما قعدهاش ليه ما سحبتوش من إيده ورجّعته؟ قلت له: سلّم على الكابتن هشام ليه؟ تاني يوم تنزل بدل الصورة؟ انت قصدك إيه؟ الواحد متضايق إحنا كل ما نقول روح رياضية، الموضوع ده للأسف مش جايب تمنه، خلاص، العين بالعين، انت تكون كويس معايا، أكون كويس معاك.مش هيبقى في احترام؟ خلاص."