كشف أحمد حسام ميدو لاعب والمدير الفني لنادي الزمالك السابق، عن واقعة جمعته بالحكم محمد معروف أثناء تدريبه لنادي مصر المقاصة في وقت سابق.

وقال ميدو: "أول ماتش ليا مع المقاصة بنلاعب الزمالك في كأس مصر والحكم كان محمد معروف الراجل ده عرباوي من سينا الراجل ده اقسم بالله فُجر في التحكيم قدام الزمالك ماشوفتش زيه في حياتي".

وأضاف: "أنا زملكاوي بس بقوله ده كفر.. كان عندنا راس حربة اسمه عمرو مرعي محمود علاء وقعه جوا منطقة الجزاء من ركبته الحكم قال العب اتغلبنا 1-0 وكنت هتجنن منه".

وأكمل: "بعدها بـ 10 أيام رايحين نلاعب المصري في السويس كان بيدرب المصري إيهاب جلال بنتحرك على السويس واحنا بنتمرن في الدفاع الجوي واحنا بنتحرك كان معروف واتنين حكام تانيين بيتمرنوا في الملعب اللي جنبنا وأنا مشوفتهمش".

واختتم ميدو: "بصيت لقيت معروف واقف في الجراج قولت لسواق الأتوبيس أقف راح موقف روحت نازل لمعروف قولتله الكرة دي مش ضربة جزاء؟ قولتله كل حاجة تتخيلها قالي أنا عرباوي قولتله أنت متعرفش حاجة عن العرباوية العرباوية رجالة وأنت مش راجل والناس قعدت تحوشني.. بعدها اتحركنا لقيت معروف هيحكملنا ماتش المصري".