تحدث عمرو أديب الإعلامي بقنوات إم بي سي مصر عن التقارير الصحفية التي أشارت إلى إمكانية وجود الخطوط الجوية القطرية كـ شركة راعية على قميص النادي الأهلي في الموسم الجديد.
وقال عمرو أديب خلال حديثه عبر قناة إم بي سي مصر: "ده موقف شخصي موضوع شخصي لا أُلزم أحد به ولا الناس اللي بتسمع ولا المحطة اللي بشتغل فيها ولا أي حد أنا بقول رأيي الشخصي".
وأضاف: "أنا كعمرو المواطن المصري الزملكاوي مش بالع فكرة أن الأهلي يلبس التيشرت اللي عليه الخطوط الجوية القطرية.. الكلام الأيام اللي فاتت أن كان في مفاوضات أتلغت متلغتش هما حطوا فلوس زيادة حطوا فلوس أقل أنا مش بالع الحكاية دي.. أنا مش أهلاوي ومش بالع أشوف الأهلي حاطت الخطوط القطرية على صدره".
وأكمل: "أنا شخصيا الموضوع بالنسبالي مش لطيف مش ظريف مش خفيف مش بالعه خالص خصوصا أنك في مصر عندك نقي يا باشا ده النادي الأهلي نقي الراعي بتاع التيشيرت بتاعك ده انت عندك شركات اتصالات وأكل وجبنة وعربيات مجاتش على الخطوط الجوية القطرية أنا بقول رأيي".
وواصل: "ناس كتير بتقول ده بيزنس وأنت عارف أن القطريين حاطين فلوس ضعف أي راعي تاني طب والأهلي هيغلب يعني؟ ياعم ما تعلي المزاد.. وتسأل ايه سر اهتمام الخطوط القطرية أنها تبقى على تيشيرت النادي الأهلي وبقولها على لساني بقوة لأنه نادي الأغلبية المصرية".
وأتم عمرو أديب حديثه: "الأيام اللي فاتت طلع كلام أن الموضوع باظ أحسن.. كل مرة أقرأ الخبر يضايقني مش بالعه".