تحدث السيد مراد محمود المشرف على تقنية حكم الفيديو الـ VARفي لجنة الحكام باتحاد الكرة عن أسباب استقالته من منصبه صباح اليوم الأحد.

وقال السيد مراد خلال حديثه عبر إذاعة ميجا إف إم: "أسباب الاستقالة؟ انا شايف المناخ مش مناسب على مواقع التواصل الاجتماعي وبيحصل بعض التجاوزات على شخصي، واحنا بنشتغل هواية اكتر منها احتراف بنتقاضى اجر مواصلاتنا مش رقم كبير بقالي 11 سنة بدأت بـ 900 جنيه في الشهر ايه اللي يخليني اتمسك بمنصبي وهو عمل اقرب إلى الهواية منه إلى الاحتراف، كأعضاء في اللجنة الفنية أو لجنة تقنية الفيديو بناخد ما يوازي 8800 في الشهر انا بنتقل للجنة الحكام ولمعسكرات ولأماكن أخرى العائد مش هو المضمون بدليل أني بقالي 11 سنة إذا لازم أكون سعيد ومبسوط علشان أقدر أقدم لبلدي ولولاد بلدي وحكام بلدي الخدمة الممتازة".

وأضاف: "تقنية الفار تتكون من سياج يبدأ من رجل الكاميرا ثم المخرج ثم حكم الفار ثم حكم الملعب عندما يستدعى للمراجعة الميدانية على الشاشة أي خلل في هذا السياج لن تحصل على المنتج النهائي، الفار ملك للمشاهدين فلازم يقدم بجودة عالية رجل الكاميرا إذا فقد تركيزه وعمل زووم ضيع مني كل حاجة، إذا المخرج مقدرش يقدم الصورة اللي أنا شوفتها بالخطوط تستمر لعدة ثواني علشان يتحقق المشاهد ده مش بإيدينا".

وعن رؤية حكام الفار لإعادات مختلفة عن التي تظهر على كاميرا التلفزيون، قال السيد مراد: "الكابل اللي جاي من الكاميرات بيدخل بالتوازي مع عربية الفار ثم عربية التلفزيون مينفعش اللقطات اللي هنا تكون غير اللي هنا الشركة تحاسب على الكلام ده ويتسحب منها الترخيص هيبقى المخرج بيعرض لقطات غير متوفرة عند الفار وده استحالة".

وأكمل: "عندنا صورة فيها النقاط التي يجب وضع الكاميرات فيها إذا يجب أن يكون هناك لقاء مع السادة المصورين لبيان ارتكازتهم، انا اشتغلت في تقنية الفار من أول يوم حتى الآن لم التقي بالمصورين، قولنالهم تقفوا فين لكن مقولناش لو اتحركت ولو عملت زوم هتفقدني الصورة يعني دي تسلل لو عملت زوم على النقطة اللي جوا الصفحة مش هتقدر تشوف الصورة كاملة لازم كانوا ياخدوا تأهيل أن دي أمكانكم والشروط اللي المفروض يعملوها أثناء التصوير".

وواصل: "الهدف بتاع المصري في الأهلي لم يكن هناك تركيز من المصور أنه يدينا الصفحة كاملة الزوم اللي عمله مدناش الموقع كامل راح في نقطة معينة هذا الرجل كان لازم يعقد معاه محاضرات للتأهيل.. اللبنة التانية المخرج عند خروج خطوط التسلل اوقات تخرج كالوميض الفار ملك للمشاهدين فأنت لازم الصورة تعرض بوقت كافي هتقولي سير اللعبة أجبره بيكون في توقفات وسط المباراة ويجب أن يكون هناك مهندس في غرفة الفار للتواصل مع المخرج، التقني لا يتواصل مع المخرج الفار اللي بيقود المفروض يقول للمهندس يبلغ المخرج يعيد تاني خطوط التسلل بزمن كافي ولا بد أن يستجيب المخرج لهذا".

واستطرد: "ليه بناخد وقت في اللعبة؟ في مهاراتين في تقنية الفيديو لما تشك في حالة عندك شاشة تحت متأخرة 3 ثواني ممكن تشوفها تاني تولد عندك شك بتروح للأوبرايتور تقوله اعرضلي الزوايا وبتبلغ الحكم لو اللعب توقف متكملش، الحكم المصري بيشوف الـ 6 كاميرات لو شاف كل لقطة في 30 ثانية هياخد 180 ثانية الحكم المصري مبيعتمدش على التكنيكال كاميرا بس بيشيك على كله، ويجب أن تنمى فيه المهاراة انه يروح للكاميرا الصحيحة من أول مرة مهارة اختيار الصورة".

وأردف: "من البدء في التقنية خدنا اجهزة السميلوتر 9 ايام فقط لتدريب الحكام يعني كل حكم قعد على اجهزة المحاكاة اقل من 10 دقايق، الطيار علشان يركب الطيارة ما لا يقل عن سنتين.. ليه مدة التدريب كانت قليلة؟ أولا كان هناك مفاوضات بين الشركة والاتحاد كان في لجنة مؤقتة وبعدين لجنة مؤقتة وتعاقد وشروط التعاقد وكنا بنطلب الاجهزة كانت مبتبقاش موجودة ويقولولنا سافرت".

وعن استماع الجماهير والأندية لما يدور في غرفة الفار، قال السيد مراد: "أنا سألت في هذه الجزئية وقالولي تسجيلات عربية الفار تستخدم للتعليم والدراسة فقط، الإجابة من المسئول الأول عن تقنية الفيديو في العالم لو جبنا موافقة اننا نعرض هيبقى عندنا حالة كل ماتش تقريبا بعد كل مباراة هتقعد وتشرح كل حالة هتتفرغ لتطوير التحكيم ولا الدفاع عن التحكيم".

طالع أيضًا:

خيرا فعل باستقالته.. السيد مراد: محمود عاشور اتخذ إجراءات صحيحة في هدف الأهلي أمام فاركو