كشف الإعلامي أحمد شوبير، عبر إذاعة أون سبورت إف إم، عن وجود تضارب في الأنباء داخل نادي الاتحاد السكندري بشأن موقف مصطفى إبراهيم من الانتقال إلى النادي الأهلي.

وقال شوبير: «في النادي الأهلي كلام كتير حول اللاعب مصطفى إبراهيم لاعب الاتحاد السكندري، والكلام حتى من أصحاب القرار بيطلع عكس بعضه، يعني ناس تقولك ده خلاص وإحنا مش رافضين يروح النادي الأهلي، ووجهات مقربة عندنا استعداد يتباع، وبعدين فجأة تسمع كلام تاني خالص برضو من داخل النادي ويقولك إحنا لا نفكر في بيع اللاعب وظروفنا لا تسمح إنه يمشي».

وأضاف: «فمتبقاش عارف أنا أطلع أقولك الخبر اليمين ولا الخبر الشمال».

وتطرق شوبير إلى احتياجات الأهلي في مركز الدفاع، قائلًا: «سؤال بس، أنت كأهلي عندك ياسر إبراهيم وياسين مرعي وهادي رياض وأشرف داري، وفي ولدين صغيرين كويسين بس دول مش في الصورة، يعني عندك هتقولي العدد ده مش كفاية طيب هنعمل إيه».

وتابع: «خلي بالك الأهلي من ساعة ما مشي عبد المنعم وربيعة والاتنين دول مش من السهل تعويضهم، مش من السهل تعويضهم، لكن في ولد زي ياسين مرعي ماشي بشكل جيد، وطبعا عمرو الجزار إصابة صعبة جدًا بعد ما جماهير الأهلي وثقت فيه يجي له صليبي».

وأوضح: «فممكن يكون الأهلي محتاج لمركز مدافع، آه ممكن، لكن في المقابل الأهلي هيمشي عدد من اللعيبة، مش عاوز أقول أسماء، لأني ببقى متضايق إني بقول اسم واللاعيب ميكونش عارف أوي ويبقى في عشم إنه يكمل في النادي فيتفاجئ إني أنا بقول كده».

وأتم شوبير: «فاللاعيبة بتزعل، أنا عارف اللاعيبة بتزعل. والله بيبقى أوقات في أخبار مؤكدة عندي بنسبة 99%، فأقول احتمال الـ1% هو اللي يمشي، فمقولوش، وأنا دايمًا اللاعيب يشعر بالأمان إلا لو حاجة واضحة تمامًا، الأهلي مش عاوز فلان، الزمالك مش عاوز فلان، فبطلع أقول وأنا متأكد 100%».