انتقد عمرو أديب ما وصفه بالحظ الاستثنائي الذي يصاحب الأهلي في مبارياته، مؤكدًا أن الفريق ينجح بشكل متكرر في حسم اللقاءات خلال الدقائق الأخيرة، وهو ما أثار دهشته وتساؤلاته.

قال عمرو أديب: "بصوا بقى، ما أنا مش هعرف ابتدي الحلقة قبل ما أطلع الشحنة الانفعالية اللي جوايا.. لازم يعني، لا هقدر أتكلم في السياسة، لازم أتكلم على حظ الجن، الأهلي عنده حظ الجن بتاع ألف ليلة وليلة، بتاع علاء الدين والمصباح السحري".

وأضاف: "عارفين المصباح السحري؟ الأهلي بقى عنده المصباح السحري اللي بيشتغل في الدقيقة 95 و96 و97، فيحك المصباح فيطلع الجن يقولك: (وأنت عايز إيه يا مصطفى؟) ويضحك كده ويحرك كرشه، فيقوله: (أنا عايز الجون بتاع الدقيقة 95)، فالأهلي يجيب الجون بتاع دقيقة 95".

وتابع: "هل فيه فرقة في العالم بتلعب بس الدقيقة 95؟ هل فيه فرقة في العالم تنافس على دوري أو تاخد دوري في الدقيقة 95؟ وبعدين جمهور الأهلي ده جمهور غريب جدًا؛ قبل الماتش ما يخلص بسبع دقايق (نادي عظيم نادي جبار)، وبعدين لما الوقت خلص جمهور الأهلي الوفي قال إيه؟ (العب يا عم خلي عندك دم)، وبعدين لما الأهلي كسب، جمهور الأهلي الوفي رجع تاني، إيه النادي ده؟ كيف له كل هذا الحظ؟".

وواصل: "منين يا حظ؟ يعني اديني حظ واديني الدوري، أنا مش قادر أصدق ده بجد، وهو إزاي يلعب ميلعبش، معاه لعيبة ما معهوش، معاه الحكم ما معاهوش.. أي حاجة ويكسب، الأهلي دائمًا يكسب".

واستكمل: "ليه أي حد في الدقيقة 90 والأهلي متعادل أو مغلوب يبقى مستني الأهلي يجيب جون؟ قولي السبب، قولي ليه؟ أنت بتبقى قاعد مهيأ لهذا الجن بتاع المصباح".

واختتم: "فكرة (من جد وجد ومن زرع حصد) هي دي اللي اتعلمناها، إنما اللي عنده حظ ياخد الدوري؟ لأ.. كفاية بقى، كفاية كفاية، ومش هنسمح بكده، والزمالك ياخد الدوري السنة دي بالأمر بالحظ، الزمالك ياخد الدوري حق ربنا بقى، وشوية عدل وعدالة تنزل على استاد القاهرة والحياة تخلص، خلص الماتش ولا جابوا جون تالت؟ عشان أقوم أروح؟ أنا.. بتلكك".