كشف الإعلامي أحمد شوبير، خلال برنامجه الإذاعي "مع شوبير" على أون سبورت إف إم، صباح اليوم الخميس، عن توصية خاصة للمدير الفني للأهلي ييس توروب لفرض الحزم داخل غرفة ملابس الأهلي الفترة المقبلة.
وشدد شوبير على أن الإدارة الجديدة لن تسمح بأي نوع من "الخروج عن النص" للاعبين: "خلاص مفيش لجنة تخطيط، مفيش إدارة سكاوتنج ولا إدارة تعاقدات.. المجلس أعلن التقدير الكامل ليهم، والقرار دلوقتي في إيد ياسين منصور وسيد عبد الحفيظ ومعاهم كافة الصلاحيات والدعم."
وتابع شوبير: "التوصية اللي اتقالت للمدرب توروب هي: عايزينك تبقى قوي وشديد جوه أوضة اللبس، وأي قرار هتاخده مع مدير الكورة إحنا مساندين ليك.. وأي لعيب هيخرج عن النص، أو حتى هيشوط 'إزازة' وهو طالع.. هيريح، أيوة هيريح وده بجد مش هزار."
وأضاف شوبير: "سيد عبد الحفيظ مش هيسيب الفرقة، هيكون متواجد ليل نهار في التمرين والمباريات، والهدف الوحيد دلوقتي هو إنقاذ الموسم بالفوز ببطولة الدوري العام، وأي عقبة قدام الجهاز الفني الإدارة هتذللها فوراً."
وعن عروض الرحيل: "الباب مفتوح للرحيل؛ اللي عايز يمشي يجيب عرض يليق بمكانته وبالنادي وهنشوفه.. الأهلي هيكون جيد جداً في العروض المادية اللي هتتقدم لعدد من اللاعبين عشان يسيطر ويفرض الحزم جوه غرف الملابس، والكل عارف إن ده عرض وطلب واحتراف."