تحدث الإعلامي أحمد شوبير عن ملف حراسة المرمى داخل الأهلي، مؤكدًا استمرار سياسة التدوير بين الحارسين في الفترة المقبلة.
وقال شوبير: "موضوع حراسة المرمى، الأهلي الحمد لله عنده أربع حراس على أعلى مستوى، التدوير مستمر في حراسة المرمى في الأهلي وده لعدة أسباب، أولها اتنين حراس مرمى منتخب مصر، الناس زمان كانت بتشوف شوبير حارس صغير ولما لعب فرض نفسه وليه بصمة، والشناوي تاريخ واسم كبير جدًا وحارس مرمى المنتخب ففي منافسة قوية داخل الفرقة".
وأضاف: "تانيها إن في منتخب مصر وبالتالي في حوار إن نحافظ على الاتنين يبقوا موجودين في المنتخب، وهذا الأمر يلقي قبول عند الكابتن حسام حسن، فنظام التدوير سيظل مستمر لفترة داخل النادي الأهلي بين الحارسين شوبير والشناوي".
وعن عقد مصطفى شوبير، قال: "أنا مش عاوز أتجرجر تاني للحديث عن عقد مصطفى شوبير، أنا قولتلكم أنا مبحبش أولياء الأمور اللي بيطلعوا، إذا كان ولي الأمر هو وكيل اللاعب خلاص الموضوع منتهي، لكن أنا مش وكيل مصطفى شوبير وبالتالي مش من حقي إني أتكلم عن عقده، لكن من حقي أتكلم عن إشاعات تافهة سخيفة مقيتة".
وتابع: "عيب نصحى امبارح على هاشتاج كلها على بعضها باينة خالص، الأهلي أولًا يا شوبير؟ لا يا سيدي الأهلي أولًا وأخيرًا وفوقًا ووسطًا وقلبًا وقالبًا وضميرًا، متتعبش قلبك في النقطة دي مع شوبير الكبير ولا شوبير الصغير، لكن العيب تتكلم على أرقام وتقول هذه الأرقام وأنت تعلم لا أساس لها من الصحة على الإطلاق".
واختتم شوبير رسالته قائلًا: "أنا بنبه جمهور الأهلي كويس إنها جات في شوبير أنا راجل بستحمل مفيش مشكلة، وأنا هنا بتكلم إني أهلاوي، الناس محتاجة التكاتف، الموقف في الدوري حرج جدًا، وجمهور الأهلي الله يخليكم الهاشتاجات والإشاعات والحاجات اللي بتترمي دي خلي بالكم منها".