نفى لاعب الأهلي إمام عاشور كل ما يُقال عن سوء سلوكه داخل النادي، مؤكدًا أن الكثير من الكلام المتداول غير صحيح. وقال عاشور: "للأسف كلام كتير مغلوط وغير صحيح بيتردد بخصوص اللي حصل. وأنا متقبل أي قرار ياخده النادي، وواثق إنه المسؤولين في الأهلي هيتفهموا موقفي كويس".
وأضاف: "أنا فعلاً عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية، وللأسف كل أسرتي بتعاني من نفس الأعراض. أنا بلغت الدكتور أحمد جاب الله بظروفي الصحية وعدم قدرتي على السفر، وده إجراء غير كافي في مثل هذه الأمور. لكن أخطأت بحسن نية، وكان المفروض أتواصل مع الكابتن وليد صلاح الدين علشان يبلغ المدير الفني وتتعامل الإجراءات الطبية المتبعة عند التخلف عن السفر".
وتابع: "الموضوع اتقفل خلاص، وتواصلت إمبارح بالليل مع الكابتن وليد صلاح الدين، وأنا تحت أمر النادي. وجمهور الأهلي سندي وظهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي".
وأشاد عاشور بعلاقته بالجماهير قائلاً: "أنا فخور باللعب في أكبر نادي في أفريقيا، وعلاقتي بجماهيره العظيمة لا تقبل القسمة على اتنين، وأرجو من الجميع إغلاق هذا الموضوع. والناس اللي بتقول إن إمام عاشر بيلوي دراع النادي بقولهم حسبي الله ونعم الوكيل، محدش يقدر يلوي دراع الأهلي، ولا يمكن أفكر بالطريقة دي أبدًا".
واختتم قائلاً: "اتشرفت بارتداء الفانلة الحمراء وبقالي 3 سنين في النادي، والحمد لله عمري ما قصرت لا في حق النادي ولا جماهيره، وده حقهم عليا. ووجودي في الأهلي نادي القرن وفي ظهري جمهور الأهلي بيعوضني عن كل حاجة. عندنا ماتش بكرة مهم، يارب كل التوفيق لزمايلي والجهاز الفني ونحقق الفوز اللي يسعد كل الأهلاوية".