كشف الحكم الدولي السابق محمد فاروق كواليس اختياره لإدارة مباراة نهائي كأس مصر موسم 2017-2018 بين الزمالك وسموحة، والتي أُقيمت وسط جدل كبير بشأن هوية طاقم التحكيم.

وقال فاروق، خلال ظهوره في بودكاست مع الإعلامي أحمد أسامة، إن اتحاد الكرة في ذلك الوقت أسند له إدارة النهائي رغم رغبة نادي الزمالك في تعيين حكم مصري، مقابل طلب سموحة لحكام أجانب.

وأوضح: "الزمالك كان عاوز حكم مصري، وسموحة عايزة حكام أجانب، لكن فرج عامر كان عايزني أنا شخصيًا لو مفيش حكام أجانب، وسبق أن أدرّت لهم مباراة ضد الزمالك وكسبوا 3-0".

وأضاف: "فرج عامر قال مش هلعب إلا بحكم أجنبي أو أنت تدير المباراة، ومعايا الدليل على ده، ومش عارف ليه الاتحاد وقتها رفض يجيب حكام أجانب رغم طلب سموحة".

وبخصوص اللقطة المثيرة للجدل في المباراة بين كاسونجو وسيد فريد، علّق فاروق: "مفيشVAR وقتها، وكان معايا حكم خامس، لكن اللي بشوفه بحسبه، ومش بيفرق معايا لون الفانلات. لو كنت شوفت الاحتكاك ساعتها، كنت هحسب فاول، أياً كانت النتيجة، حتى لو الدوري يتلغي. ولما شوفت اللعبة مؤخرًا، هي فاول طبعًا".