قال محمد الدماطي، عضو مجلس إدارة النادي الأهلي، إن إدارة النادي بتعمل بكل جهد علشان تلبي رغبات جمهور النادي والجمعية العمومية، مؤكدًا إن المنظومة مش سهلة خالص، خصوصًا مع وجود جماهير للكرة وألعاب صالات والجمعية العمومية والفروع، كل واحد ليه احتياجاته.

وأوضح الدماطي في تصريحاته: "الظروف الاقتصادية مش سهلة على حد، الناس شايفين إن فيه ميزانية كبيرة وفائض، لكن ده مش جاي من فراغ، ده نتيجة مجهود كبير وسط ظروف صعبة في البلد  الدولار وصل لخمسين جنيه، كنا بدأنا الدورة بـ15 جنيه، ده بيخلق صعوبة في جذب اللاعبين أو حتى الحفاظ عليهم  الناس مش فارق معاها الظروف دي، هم عايزين يشوفوا بطولات ونتائج."

وأضاف: "إحنا شغالين على قد ما نقدر علشان نقدم أفضل أداء ونحقق بطولات تفرح جمهورنا، وأكيد ده حقهم  الحمد لله حققنا بطولات في كل الألعاب سواء كرة القدم أو ألعاب الصالات."

وتابع الدماطي: "إدارة الكرة تحت قيادة الكابتن محمود الخطيب مش بتبخل بأي مجهود، حتى لو في تعثر، كنا دايمًا بنرجع أقوى."

واختتم تصريحاته قائلاً: "الأداء الجيد وزيادة اللاعبين المميزين هيساعدونا على تقديم أفضل أداء وتحقيق المزيد من البطولات في المستقبل."