كشف محمد مجدي أفشة عن أسرار احتفاله بالقاضية في أوضة اللبس وهدفه الأغلى على الزمالك وفوز الأهلي بنهائي القرن وإحرازه هدف القاضية وإحرازه لبطولة أفريقيا عام 2020.

وقال أفشة في تصريحات مع أحمد شوبير في برنامج "حارس الأهلي" على قناة الأهلي: "كان فيه جنان في أوضة اللبس عشان بين الشوطين كان فيه زعيق عشان مكناش أحسن حاجة والأداء مكنش كويس".

وتابع: "سعد كان عاوز يضربني، عشان كمان سعد جالي بين الشوطين وفضل يعنف فيا وقالي لو بقيت كويس هنكسب ولازم يكون عندك مردود أكتر من كده في الملعب".

وأضاف: "الشناوي كان أعلى صوت في أوضة اللبس ودايما بيتكلم في الحتة دي، وكابتن سيد عبد الحفيظ كانت فرحته مش طبيعية وهو مجنون أهلي بيحب الأهلي موت".

وأكد: "روحت على البلد وده من أحلى أيام حياتي وكان يوم أحلى من فرحي اتفاجأت الناس قابلتني في الطريق وفضلوا شايلني من أول مادخلت البلد لحد البيت، ودي حاجة كبيرة ليا ومكنتش مصدق اللي بيحصل ده".