كشف علي لطفي حارس مرمى الفريق الأول لكرة القدم بنادي زد، كواليس عدم انضمامه للنادي الأهلي بعد إصابة محمد الشناوي حارس مرمى الفريق في كأس أمم إفريقيا.
وقال علي لطفي خلال حديثه عبر قناة أون تايم سبورتس: "كنت في معسكر كان عندنا ماتش لقيت تليفون من كابتن أمير توفيق قالي جاهز ولا ايه قولتله جاهز لايه قالي أنت مقرتش الأخبار؟ قولتله يمكن تبقى أخبار مش حقيقية قالي الشنطة جاهزة قولتله اه جاهزة متقلقش بس الأول نادي زد الناس في قمة الاحترام والتقدير معايا فمينعفش اطلع إلا من خلال النادي وموافقة النادي".
وأضاف: "أمر توفيق قالي احنا خلاص اتفقنا مع الإدارة وان شاء الله قريب تبقى موجود معانا قولتله خلاص معنديش أي مانع النادي الأهلي هو بيتي اسمي ظهر بشكل أقوى مع النادي الأهلي فمن الصعب النادي يكون محتاجني بعد إصابة الشناوي وأنا أرفض".
وأكمل: "بعدها لقيت تليفون من إدارة زد قالولي أنت عاوز ايه قولتلهم أنا معنديش مشكلة بس القرار الأول والأخير بتاعكم سواء موافقين أو رافضين بس أنا مقدرش أقول للنادي الأهلي لا لو انتوا مش عاوزني اطلع مش هينفع أنا أقول كدة".
وواصل: "الأمور راحت وجت ولقيت أسماء حراس تانية دخلت في الموضوع أمير كلمني تاني بصراحة قالي هو في مشكلة بينك وبين الجهاز الفني قولتله مفيش أي مشكلة قولتله حصل في تاتشات بيني وبين ميشيل يانكون بس في الأول والآخر هو مدرب وأنا لاعب مقدرش أتعدى حدودي معاه قالي طب خلاص منعرفش الأيام الجاية فيها ايه ولسة هنشوف وبعدها توقف الحوار".
واختتم علي لطفي حديثه: "التعامل بيني وبين الشناوي ومصطفى شوبير كأخوات كنا بنقعد مع بعض أكتر ما بقعد مع أهلي كانوا بيكلموني بيسألوني الموضوع وصل لفين واننا محتاجينك معانا الفترة دي الشناوي بيقولي مش عاوز تيجي ليه قولتله مين المجنون اللي مش عاوز يجي الأهلي قالي الدنيا واقفة ليه قولتله معرفش وبعدها الحوار اتقفل".