كشف أحمد شوبير الإعلامي بقنوات أون تايم سبورتس، عن طلب السويسري مارسيل كولر المدير الفني للفريق الأول لكرة القدم بالنادي الأهلي، من إدارة النادي.
وقال شوبير خلال حديثه عبر إذاعة أون سبورت: "كولر طلب من إدارة النادي التعاقد مع حارس مرمى علشان بطولة إفريقيا يعني الأهلي لو لم ينجح في ضم حارس مرمى قبل يوم الأربعاء المقبل مش هتفرق مع كولر بس كولر عاوز حارس مرمى الأهلي بيكثف اتصالاته".
وأضاف: "الاتجاهات اللي الأهلي بيمشي فيها وبيتحرك فيها.. الاتجاه الأول محمد بسام الاتجاه الثاني علي لطفي وقد يكون هناك اتجاه ولو بسيط مع محمد أبو جبل".
وأكمل: "نادي سيراميكا كليوباترا رفض رفضا باتا رحيل محمد بسام والمدير الفني قال ده الحارس الأساسي بتاعي لو عاوزينه ادوني مصطفى شوبير إعارة قدام إعارة ورغم أن النادي الأهلي عرض حمزة علاء لكن سيراميكا كليوباترا رفض بسبب أن الحارس البديل عنده حارس المنتخب الأولمبي ولو الاتنين راحوا يلعبوا أولمبياد مش هيكون معاه حارس".
وواصل: "علي لطفي قلقان لأنه مشي مع الجهاز ده ولو رجع ميضمنش يلعب أساسي لسة بيحسبها شوية خاصة أنه الأهلي مدخلش بشكل حاسم أنه يخلص علي لطفي".
وأردف: "الأهلي مطالب أنه يتعاقد مع حارس مرمى في خلال 48 ساعة ويعلن عنه علشان يسجله في قايمته الإفريقية".
واختتم شوبير حديثه: "محمد أبو جبل مع محمد الشناوي لن يستقيم الأمر.. الاتنين مش هيبقوا مع بعض في النادي الأهلي".