أكد سيد عبد الحفيظ، مدير الكرة السابق بالنادي الأهلي، أنه لا يشغل باله كثيرًا بالمناصب أو المسميات الرسمية داخل النادي، بقدر اهتمامه بالدور الحقيقي الذي يؤديه، مشددًا على أن النجاح في الأهلي تحدٍ خاص لا يُقارن بأي نادٍ آخر في أفريقيا.

وقال عبد الحفيظ خلال ظهوره على قناةMBC مصر مع الإعلامي مهيب عبد الهادي”:أنا مش بفكر في المسمى، مدير رياضي ولا مدير كرة ولا غيره.. أنا يهمني دوري إيه؟ بشتغل إزاي؟ بضيف للنادي ولا لأ؟ ده الأهم بالنسبة لي”.

وأضاف: "محمد يوسف موجود مع الفريق وبيقدّم دور كبير، مش بس كمدير رياضي، لكن كخبرة قوية بتساعد المجموعة في توقيت مهم جدًا".

وعن احتمالية توليه منصب إداري جديد مثل المدير الرياضي أو الترشح لمجلس الإدارة، قال عبد الحفيظ:"أنا ما بفكرش لبعد 3 أو 4 سنين.. بفكر في الوقت الحالي وبشتغل عليه. الأحداث في مصر متغيرة وسريعة، ممكن يحصل تغيير في لحظة، فبشتغل على الموجود وبس".

وأوضح:"النجاح في الأهلي مش سهل، والاستمرارية في النجاح أصعب. الأهلي عنده منظومة مؤسسية بتبني صح، حتى لما نختلف أو نخرج، بيبقى فيه احترام واحترافية. وده مش موجود في أفريقيا بنسبة كبيرة".

وعن إمكانية العمل خارج الأهلي، أجاب:"اتعرض عليا حاجات طبعًا، ومفيش مانع أشتغل في نادي محترم، لكن النجاح في الأهلي ليه طعم تاني وصعب يتكرر".

واختتم عبد الحفيظ حديثه بالإشادة بالمنظومة الحمراء، مؤكدًا أن قوة الأهلي تأتي من عناصر متعددة مثل الاستقرار الفني والإداري والدعم الجماهيري والرموز التاريخية، وهي مقومات تصنع الفارق دائمًا.