تحدث مارسيل كولر المدير الفني للأهلي عقب الفوز على ميدياما بهدف حسين الشحات ووصول الفريق إلى النقطة التاسعة مواصلا تصدر المجموعة.
وقال كولر: "الماتش كان صعب جدا، فريق ميدياما عملنا مشاكل بالذات في الشوط الأول، كنا مفتقدين الرتم بتاعنا وكان عندنا بعض المشاكل ، الشوط التاني تداركنا الموقف وبقى شكلنا احسن لكن في المجمل ميدياما كان فريق وكان حظنا كويس في الجون اللي احنا جبناه ، جبنا جون رائع جدا بضغط حلو جدا بشكله و حاجات كتير احنا متدربين عليها اتعملت في الجون ده".
وأضاف كولر: "جالهم فرص احنا كمان كان عندنا فرص لكن كان ممكن يكسبوا المباراة بالفرص اللي خلقوها لكن الماتشات دي بتبقى كده بتبقى فيها صعوبة بسبب الجو بسبب ارضية الملعب بسبب الاجواء وكان في صعوبة لينا اننا نلعب الكورة بتاعتنا على ارض الملعب دي لان ارض الملعب كانت صعبة جدا نجيلة عالية جدا واحنا الكورة بتاعتنا دايما بتبقى على الأرض وتكون فيها كورة جمالية على الأرض وتمريرات كتير".
وأشار كولر: " الروح القتالية ورغبتنا في الفوز كانت من قبل المباراة قوية جدا احنا مصرين من قبل ما نيجي احنا جايين هنا عشان ناخد تلات نقط وقدرنا ان احنا نحقق ده الحمد لله".
وتابع كولر تصريحاته: ""طبعا نقدر ان شاء الله باذن الله نمشي بعيد في البطولة ونحقق البطولة المشكلة اللي عندنا هي مشكلة الرتم، التوقف اللي حصل بسبب المنتخب وبسبب بطولة افريقيا قعدنا 50 يوم ما نلعبش ماتشات رسمية ده بيفرق كتير جدا مع اي لاعب".
وأوضح كولر: " اللعيبة الدولية لعبة في رتم مختلف وخدت اجازات مختلفة اللعيبة اللي كانت معايا بتتمرن ما كانتش بتشارك في اي ماتشات رسمية اختلاف، الفرق بين رتم اللاعيبة بياخد وقت عقبال ما اللعيبة تاخد الرتم كلها مع بعض".
واختتم كولر تصريحاته: "لما ناخد الرتم ويحصل انسجام هنقدر نمشي احسن هيبقى شكلنا افضل بكتير السنة اللي فاتت برضه احنا ما كسبناش كل الماتشات في دوري المجموعات واتأهلنا بصعوبة ورغم كده الحمد لله خدنا البطولة مش لازم تكسب كل الماتشات عشان تاخد البطولة لازم تؤدي اداء كويس وده كان مهم جدا النهارده ان اللعيبة تدرك ده ان انت لازم تدي 100% وقدام اي منافس عشان تكسب وان انت احيانا في بعض الماتشات لازم كمان تعدي حدودك عشان تدوس على نفسك عشان تقدر تكسب واللعيبة عملت ده النهارده عشان كده سعيد بالفوز النهارده جدا ان شاء الله القادم افضل".