انتقد الإعلامي أحمد شوبير عدم الاعتذار عن الأخبار التي تكون مغلوطة والتي تتأكد عدم صحتها مشيرا بأن الأمر وارد في ان تنقل خبر خاطئ ولكن الأهم هو الاعتذار عنه.
وقال شوبير عبر برنامجه الإذاعي: "أنا ممكن أجيب خبر ويطلع غلط، فأقول لك أنا آسف، أنا خبري غلط، لكن لما اجيب خبر ويطلع غلط واصمم على إنه خبر صحيح، يعني مثلا في موضوع امام عاشور لما وقع للنادي الأهلي، فطلع واحد من الزملاء من 6 أسابيع قال لك إمام عاشور هيغيب 12 أسبوع على الأقل والإصابة صعبة للغاية وأصعب إصابة وقالك كمان فترة لا تقل كمان عن خمس شهور".
وأضاف شوبير: "الدكتور قال يا جماعة الراجل هيبدأ فترة إعداد مع الأهلي عادي، دكتور محمد أبو العلا والدكتور أحمد أبو عبلة قالو كده قالو هيبدأ عادي مع الفرقة، مفيش مشكلة، فرجع تاني تأكيد وتأكيد وتأكيد لحد ما جات مباراة إمبارح فإمام عاشور شارك ولعب مع الفريق".
وأوضح شوبير: "امام عاشور لعب واداله وبالتالي بقت عنده فرص إنه يشارك في المباراة القادمة، مباراة السوبر الإفريقي".
واختتم شوبير تصريحاته: " أنا بحب شجاعة الاعتذار لما تغلط تقول خبر "هبد" ، أنا ساعتها كلمت أحد الأصدقاء، يعني قلت له الخبر ده غير صحيح، وأنا اتصلت بالدكتور والخبر غير صحيح، فرجع وأكد ان الخبر صحيح، قلت له خلاص وأنا غلطان إن أنا بلغت، عشان بس تبقى في هناك مصداقية ، ياريت نحاول نجتهد شويه لما يكون عندنا مصادر ولا حاجه، أو لما نجيب خبر نقول الخبر صحيح يعني".