طمأن أحمد حسام ميدو جماهير الزمالك بعد استقالة مجلس الأخيرة مؤكدا بأنه سيحارب من يعمل لأجندته الشخصية مطالبا وزير الشباب والرياضة بالتدخل.
وأوضح ميدو: "الزمالك كان رايح في حتة وحشة وعليه مديونيات لكل الاتحادات، في وقت من الأوقات ترفع ايديك وتقول مش هاكمل، باحترم كل أعضاء مجلس الإدارة أنهم قدموا استقالتهم".
وأضاف ميدو: "بطمن جمهور الزمالك احنا موجودين على الأرض الزمالك عمره ما هيقع وهنساعد النادي والمدرب هيشتغل على برنامجه وقطاع الناشئين متنظم كويس".
وتابع ميدو: "احنا هنساعد أي حد موجود، بس بشرط ان أي حد يكون موجود يشتغل لمصلحة الزمالك مش لمصلته الشخصية أي حد هيشتغل لأجندته الشخصية هنحاربه وبنطلب تدخل سريع من وزير الشباب والرياضة ويكون فيه خطة لإنقاذ النادي".
وأشار ميدو:" كل الزملكاوية تعبوا من اللي بيحصل، الموقف كان صعب والأمور صعبة جدا، لازم يبقى فيه حل، وانا بره مصر أول ما هنزل هقابل الوزير وافهمه وايه هي خريطة الإنقاذ".
واستكمل ميدو تصريحاته: "الزمالك دلوقتي مش محتاج منظرة، فيه ناس بتوع كلام، الزمالك محتاج أبناؤه يقفوا جنبه بجد مش كلام، مبدئيا بطمن جمهور الزمالك الأمور منظمة كويس، قطاع كرة القدم والناشئين عاملين خطة كويسة لكل فرق القطاع".
واختتم ميدو تصريحاته: "بطمن جمهور الزمالك، متقلقوش، زيزو مش هيمشي من الزمالك، القيد موقوف، زيزو لعيب مهم جدا في الزمالك وأحسن لعيب في مصر وهنحارب أي حد يوافق على رحيله، زيزو مش للبيع، واي حد هيقعد على كرسي الزمالك مش هيمشي زيزو، وملف فتوح وصبحي شغالين عليه كويس، باشوف ناس بتنتمي للنادي الأهلي بينكشوا في موضوع فتوح، الزمالك يمر في مرحلة صعبة بقولهم عيب احترموا نفسكم".