تحدث عدلي القيعي رئيس شركة كرة القدم بالنادي الأهلي، عن الأزمة المالية التي يمر بها النادي، مطالبًا بالحصول على حقوق النادي من أجل المقدرة على استكمال مسيرته.
وقال عدلي القيعي خلال حديثه عبر قناة النادي الأهلي: "متعرقلنيش بمليون حاجة متعرقلنيش يبقالي فلوس ومش عارف اخدها، النادي الأهلي كل يوم والتاني بيمضي حقوق رعاية والناس تقول انت مهتم بالرعاية والانشاءات لا النادي الأهلي معندوش سيولة تكتشف المفاجئة بقى.. اسبابها ايه؟ لازم يبقى في توقف النادي الأهلي ياخد حقوقه".
وأضاف: "الأهلي مش طالب دعم انا طالب اخد حقي النادي الأهلي ينفق اكثر مما يحصل عليه انت بتقول 2 مليار على 4 سنين يعني 500 مليون الرعاية.. المصروفات تتجاوز 800 او 900 مليون وتقترب من مليار ما بين نشاط رياضي وكرة قدم ورواتب.. انت مش بتحصل على حقوقك في التوقيتات اللي بتفيدك فزيك زي الأندية اللي مش مستقرة".
وأكمل: "لما تيجي تحط ايدك في جيبك ويبقى عندنا اقساط ودفعات للعيبة او مستحقات للاجانب محصلتش قبل كدة عندي كل الدخل ده بس حقيقة الامر انا رصيدي ايه في البنك؟ سيولة فين الناس اللي لازم تديني حقي بقى مش طالب حاجة دلوقتي مؤقتا اديني حقي علشان اعرف اشتغل".
وواصل: "الناس بتقول بلاش بخل انتوا عارفين الكلمة دي لما تطبقها على ارض الواقع انا شايف ان فيها انفاق لا مبرر احيانا لحجم الانفاق ده غير ان الناس طمعانة فيك لما يطرح اسم النادي الأهلي في اي صفقة برة مصر أو جوا مصر يكلموك من ليفل تاني خالص عاوز يشاركك في انك انت شديد الثراء وهذا غير حقيقي".
وأردف: "انت عاوز في توقيت معين تدبر عملة صعبة في ظروف انت مش حاطت ايدك في جيبك وبتلاقي المبالغ اللي انت محتاجها وفي توقيت معين كنت مستعد تضحي بكل الاولويات علشان توقف الفرقة دي على حيلها علشان دي اللي بتجيب رعاية كويسة وفلوس من المشاركات الافريقية وغيرها انا عاوز استمتع بجماهيرتي علشان تحققلي المداخيل المطلوبة مش عارف".
وأتم القيعي حديثه: "الناس كلها بتفتح مدرجاتها وشوفنا صن داونز والوداد السنة اللي فاتت لاعبنا ازاي كل الاندية هتلاعبنا ازاي امتى هنعيش ظروف كروية طبيعية نعمل ايه؟ نطبق الظروف الطبيعية واللي يغلط يتحاسب بمنتهى الصرامة انا متأكد ان الجماهير هتبقى مسئولة وهتخاف على ناديها انها تأذيه وهتخاف على تواجدها في المدرجات واجه المشكلة علشان تقدر تحلها إذا كنا مقتنعين ان دي اسباب العالم كله بيستفيد منها إلا إذا كنا بنقول ان دي حجج يبقى احنا صح والناس اللي برة ماشية معاهم".