كشف خالد مرتجي أمين صندوق النادي الأهلي، عن تفاصيل ما تعرض له الفريق الأول لكرة القدم بالنادي خلال تواجده بالسودان لمواجهة نادي الهلال.

وقال مرتجي خلال حديثه عبر قناة النهار: "النادي الأهلي جزء من كيان مصر العظيمة، والنادي حريص جدا على علاقته بجميع الأندية الإفريقية وخاصة الأندية العربية والحقيقة اللي حصل من نادي الهلال دي مش أول مرة دي تالت مرة".

وأضاف: "ترفعنا أول مرتين خاصة عام 2020 لما اقتحموا الملعب وكانت هتحصل مشكلة لكن العلاقة بين الشعبين المحترمين بين الشعب السوداني والمصري خلت النادي الأهلي يترفع أنه ياخد خطوة ضد نادي الهلال.. لكن اللي حصل الماتش اللي فات مينفعش أننا نسكت عليه".

وأكمل: "اللي حصل ده يدل على الجهل بقدر النادي الأهلي من المسئولين في نادي الهلال وللأسف حتى تصريحاتهم كلها معرفش هل فيها نوع من كيد النسا أو إرضاء لأشخاص معينة أو كيانات معينة مش بتحب النادي الأهلي كلها تصريحات غير مسئولة".

وواصل: "احنا سافرنا يوم الخميس واتمرنا تمرين واحد يوم الجمعة وجمهور الهلال اقتحم فيها ملعب المباراة في وجود منسق الكاف والمفترض أنه كتب الكلام ده في تقريره اللي حصل في الماتش مينفعش يتسكت عليه، لما شوفت فيديو علي لطفي أنا كنت أكاد أكسر التليفون من القهرة اللي أنا شوفتها وجوا الماتش عبد المنعم بيترش عليه بنج كل الحاجات دي تدل على أن الناس دي تفتقر للروح الرياضية وجهلة بقيمة وقدر النادي الأهلي احنا متأخرناش احنا بندرس كل حاجة وبعدين ناخد القرار".

وأتم خالد مرتجي حديثه: "معرفش الناس بتفكر ازاي لكن بنحاول نجيب حق الأهلي بالمستندات بالصوت والصورة وده من ضمن الحاجات اللي خلتنا نتأخر علشان بنجمع كل المستندات علشان لما نبعت الشكاوى تبقى مدعمة والمفروض يتاخد قرار من الكاف ضد نادي الهلال واتمنى ده اللي يحصل".