كشف أحمد شوبير الإعلامي بقنوات أون تايم سبورتس عن كواليس جديدة لمحاولات إدارة نادي الزمالك لقيد الثنائي الأجنبي في قائمة فريقي السلة والطائرة.
وقال شوبير خلال حديثه عبر إذاعة أون سبورت: "في قضية دمها جميل ولذيذ وعسل أبيض وحلاوته زيادة.. الزمالك جايب أتنين أجانب الأمريكي تو هولواي محترف السلة، والاسباني أندريس فيلينا محترف فريق الطائرة".
وأضاف: "الزمالك جاب لاعب السلة بنصف مليون دولار.. في رسوم اتحاد السلة لقيد اللاعب المحلي بيبقى 5% اللاعب اللي جاي من برة تبع الاتحاد الدولي بيبقى 7% وفي 14% قيمة مضافة وفي 2% رسوم تنمية.. لما الزمالك راح يسجل اللاعب اتحاد السلة قاله ادفع كذا قاله مش هدفع قاله مش هتسجل، قاله يعني ايه مش هسجل، قاله يا فندم الرسوم كدة، قاله لا هسجل، قاله يا فندم هتسجل ازاي؟، قاله لا انا هسجل، قاله شوف مين هيسجلك".
وأكمل: "ونفس الأمر اتحاد الكرة الطائرة.. اتحاد الطائرة ناس ذوق ذوق ذوق الصراحة يعني قالهم مش هسجل قالوله متسجلش بس اعملي شيك أي كلام كدة تمام التمام فميسجلش ويتعمل شيك كدة وحين ميسرة".
وواصل: "الناس بتوع السلة محترمين عاوز تلعب ادفع انت دافع في اللاعب نصف مليون دولار.. الزمالك عنده حجز على حساب واحد فقط من عشر حسابات في عشر بنوك والحساب ده هو أقل حساب فيه فلوس".
وأتم شوبير حديثه: "الزمالك قال هنوقف النشاط الرياضي، وقف أنت حر عادي يعني مفيش مشكلة 1+1= 2 عمرهم ما هيبقوا تلاتة ولا عمرهم هيبقوا واحد، مش في نظام؟ وكلنا بنتكلم في النظام.. أنت دفعت نص مليون دولار في اللاعب خليهم 550 ألف ايه المشكلة عادي يعني الاتحاد له 7% بس الباقي دي قوانين دولة في ايه يا جماعة القصة ايه؟".