حرص أحمد شوبير الإعلامي بقنوات أون تايم سبورتس على توجيه رسالة للحكم محمد معروف بعد الخطأ الذي ارتكبه خلال مباراة الزمالك وسيراميكا كليوباترا بالدوري الممتاز بعدم إشهار البطاقة الحمراء لـ زكريا الوردي لاعب خط وسط الفريق الأبيض.
وقال شوبير خلال حديثه عبر إذاعة أون سبورت: "تحليل مارك كلاتنبرج المشرف على لجنة الحكام لحالات الجولة الثانية من بطولة الدوري أكد أحقية طرد زكريا الوردي أمام سيراميكا كليوباترا وعدم أحقية الإسماعيلي في ركلة جزاء أمام المحلة".
وأضاف: "جميل أن كلاتنبرج بيقول هذا الكلام وبيقول أن زكريا الوردي كان يستحق الطرد بس اللي مش جميل أبدا هو الحكم محمد معروف ده عمره ما يكون جميل ولا يكون حلو".
وأكمل: "أنا مش عارف ليه هو أنت يا حكم خايف من ايه؟ ايه اللي قالقك؟ حكم دولي وليك اسمك وليك مواصفاتك لا ينقصك شئ على الإطلاق ليه مبتطلعش الكارت لأي لاعب كارت أول تاني تالت رابع ايه المشكلة يعني".
وواصل: "حاجة عجيبة جدا بصراحة أنا مش فاهمه والأخطاء من نفس الحكام بتتكرر والغريب لما يتكلموا معاك بيكلمك أن أنت اللي غلطان، يعني مثلا يعني بتقوله حصل كذا كذا يقولك لا لا يا كابتن اتفرج على اللعبة كويس أقوله اتفرجت كويس يقولي لا يا كابتن معلش عيد اللعبة تاني أصل حضرتك أهلاوي أو زملكاوي أو إسماعلاوي".
وأتم أحمد شوبير حديثه: "أنا عجباني فكرة التحليل بتاعت كلاتنبرج يارب يستمر عليها ويارب هو يستمر في السرد بالشكل الجميل ده حتى لو اختلفنا معاه في بعض القرارات".