تحدث أحمد شوبير الإعلامي بقنوات أون تايم سبورتس عن المشاكل المستمرة التي تواجه الحكام، بل وأكد أنهم هددوا بعدم خوض مباريات الدوري بسبب مستحقاتهم المالية المتأخرة.

وقال شوبير خلال حديثه عبر إذاعة أون سبورت: "دايما الموضوع بتاع التحكيم فيه حدوتة وفيه مشكلة متفهمش ليه.. انت اتحاد الكرة قولت مع قيد الأندية للاعبيهم هتدفع للحكام مليون جنيه وشوية انهاردة الأهلي اللي شاري برونو سافيو بمليون ونصف أو الزمالك اللي مسجل سامسون أكينولا بمليون و300 ألف دولار ده طب فين الفلوس انت بتاخد نسبة بتاخد فلوس اللعيبة ومش عارف تاخد الحكام ولا هي ماشية بالود والحب والحنية طلعوا للحكام فلوسهم".

وأضاف شوبير: "انهاردة الحكام بالفعل هددوا قالوا مش هنحكم لأنه من شهر مارس مخدوش فلوس وجابوا الراجل كلاتنبرج قالوله مش بنقبض فلوس قالهم يعني ايه؟".

وأكمل: "انا جايب واحد من إنجلترا علشان ادخله في الدوامة بتاعت ده قبض وده مقبض؟ ده كلام وده ينفع؟ الراجل ماله ده هيصلح الفار والشكل في الملعب وأسلوب التحكيم من أوله لآخره ممكن يدخل آليات جديدة ممكن يتفق مع الشركة بتاعت الفار لأن في كذا أوبشن يبقوا موجودين ممكن يعمل محاضرات مع الحكام علشان الدنيا تمشي بشكل كويس لكن اللي انتوا بتقولوه ده مينفعش".

وواصل: "تخيلوا احنا عمالين نقول هنلعب في وسط كاس العالم والحكام مراحوش طبعا هتتعلقهم المشانق نمرة اتنين شطب وندب وشغلانة وحدوتة.. أنت من الأول وفر البيئة الجيدة للنجاح لكن بالشكل ده أنا ابقى خايف وابقى قلقان".

وأتم شوبير حديثه: "كلاتنبرج قال هقعد مع الاستاذ جمال علام.. يا مستر كلاتنبرج تقعد مع السيد جمال علام في الاوضاع الفنية متدخلوش الراجل ده في الدوامة دي.. انا اقسم لكم بالله لو كلاتنبرج دخل في الدوامة دي مش هيعرف يخرج منها وهياخدها من اتحاد الكرة للمطار جري يقولك حقي برقبتي ويركب الطيارة ويسافر ويقطع تذكرة بلا عودة.. وفروا له أجواء النجاح".