تحدث النيجيري جونيور أجايي لاعب النادي الأهلي سابقًا وفريق سموحة الحالي عن سبب رحيله عن القلعة الحمراء ورفضه لعرض بيراميدز، وموقفه من الانضمام للزمالك، وغيرها من الأمور.

وقال أجايي خلال حديثه عبر أون سبورت: "أعتقد أن قرار رحيلي كان بيد النادي الأهلي والإدارة والمدرب موسمياني كان صاحب القرار لكن بالنسبة لي لم يكن لدي أي مشاكل مع الإدارة أو المدرب ولكن كل مدرب يكون له رؤية خاصة به بالتأكيد لم يكن معجب بأسلوبي ولكن هذا لا يعني أنني لاعبا سيئًا أو هو مدرب سيئ كل فريق له متطلباته وأهدافه لكن لا يوجد أي شعور سيئ من تجاهي".

وأضاف: "بعد الرحيل عن النادي الأهلي جالي عرض من بيراميدز لكن للأسف كان في صدمة كبيرة وضغط كبير لأن الجماهير نفسهم كانوا بيبعتولي رسائل مش عاوزني أسيب النادي أو ألعب لأي فريق في مصر غير النادي الأهلي لأن علاقتي مع الجماهير ممتازة ومع الأسف حاولت أني أحافظ على العلاقة دي لأنهم عرفوني لمدة 5 سنين وعلشان كدة كنت مضطر أني أخرج برة مصر علشان ألعب لأي نادي".

وأكمل: "مقررتش أروح بيراميدز في الفترة دي بسبب الضغط الجماهيري الكبير اللي كانوا زعلانين أني سبت النادي الأهلي ومكانوش متقبلين أني ألعب لأي نادي تاني أنا متأكد أن الجماهير كانوا سعداء جدا أني ملبعتش لأي نادي مصري طول الـ 6 شهور اللي أنا سافرت فيهم خارج مصر".

وواصلك "لو كان في عرض من الزمالك كان هيبقى قرار صعب لأن الزمالك نادي كبير كان هيبقى القرار كبير وكل اللاعبين تتمنى أنها تلعب لأندية كبيرة فلو كان في عرض اتقدم من الزمالك كان لازم أفكر فيه لأن الزمالك هو المنافس التقليدي للنادي الأهلي متأكد 100% أن لو قررت ألعب للزمالك حاليًا الزمالك مش هيبقوا غضبانين مني لأنهم عرفوا الأسباب اللي خلتني أسيب النادي حاليًا عارف أن الجماهير هتدعم قراري لأن الحقايق اتكشفت".

وأتم أجايي حديثه: "ده كان حلمي أني أكمل بقيت حياتي في كرة القدم داخل النادي الأهلي لأني حسيت أني أنجزت كتير في النادي الأهلي ولو رجعتله تاني أنا بعتبره بيتي وعارف أن الباب مفتوح ليا وعارف لو في فرصة جت أنا بتطلع ليها بشكل كبير جدا رجوعي هيبىقى شئ ممتاز ليا لكن دي كرة القدم أنا في سموحة فهعتبره بيتي الجديد وكل تركيزي معاه لكن لو في فرصة في المستقبل أنا مستعد أرجع للنادي الأهلي".