أكد البرتغالي ريكاردو سواريش المدير الفني للفريق الأول لكرة القدم بالنادي الأهلي أنه فخور بما يقدمه لاعبي الفريق في المباريات الأخيرة التي خاضها.

وقال سواريش في المؤتمر الصحفي بعد نهاية مباراة الأهلي والإسماعيلي: "الشوط الأول مكانش كويس بالنسبة لنا كان الخصم أفضل - حتى واحنا معانا الكورة مكناش أقوى حاجة هجوميا كان في بعض الأمور بتتصلح الشدة بتاعتنا مكانتش هي هي".

وأكمل: "الخصم عنده لاعبين مميزين وفي كفاءة فنية واللي عمل فايدة لينا في الشوط الأول التنظيم الدفاعي بتاعنا اننا قدرنا نخرج الشوط الأول والنتيجة 0/0 - الشوط التاني الأمور اختلفت اتكلمنا مع اللاعبين بين الشوطين وقدرنا نصلح ونغير بعض الأمور قدرنا ندخل المباراة بشدة أكبر ونكون أحسن وقدرنا نحافظ على نفس التنظيم الدفاعي بتاعنا يعني الخصم معملش أي خطورة غير كورة واحدة وكانت أوفسايد".

وأضاف: "واحنا للأسف ضاع مننا كورتين قدام المرمى واحدة منهم كان الحارس مش في المرمى وكان لاعب واحد هو اللي قريب من المرمى لكن مأثرناش التأثير الكافي أننا نسجل هدف".

وواصل: "أنا بشكر اللاعبين وبحييهم على القدرة بتاعتهم في العمل والشغل أنا فخور جدا باللاعبين الصغار ولاعبي الفريق الأول مهمين جدا بالنسبالنا لأنهم بيدوا مثال طيب للاعبين الصغار أن يبقى ليهم شخصية ويقاتلوا علشان النادي الأهلي في الملعب - بنخلق الظروف اللي تسمح أنهم يكون مستقبلا أفضل بكثير".

وأتم سواريش حديثه: "صعب جدا تحط مجموعة من اللاعبين الصغار مع بعض مرة واحدة لازم نعملها بحساسية جدا - لازم نديهم الظروف اللي تسمح لهم أن ده لاعب صغير لما يدخل المباراة يقدر يأدي كويس لكن يستحقوا احترامي وتقديري".