أكد إسلام الشاطر، مقدم البرنامج الرئيسي في قناة النادي الأهلي والذي يُسمى "البيت الكبير" أن بيتسو موسيماني، المدير الفني السابق للفريق الأول بالقلعة الحمراء هو من طلب الرحيل، ولم يتم دفعه للاستقالة.

وقال الشاطر في تصريحات عبر برنامجه على شاشة الأهلي: "هناك سؤال يسأله كل حسن النية من جمهور الأهلي، (انتوا مشيتوا موسيماني ليه في منتصف الموسم ؟ ايه اللي عملتوه ده ؟)، ويقولون إنه حصل على بطولتي دوري أبطال إفريقيا ومثلهما في السوبر وبرونزتي كأس العالم للأندية".

 وأضاف لاعب الأهلي السابق: "الانسان إو الشخص الذي يسأل هذا السؤال أقول له، (موسيماني طلع كام مرة قال إنه مشي عشان هو عاوز يمشي ؟!! هو طلب إنه يمشي) ".

وتابع:" (طالما انت طلبت تمشي، فالأهلي أكبر من اي اسم مدرب، اللي عاوز يمشي الباب يفوت 20 جمل، فايلر قبله عمل كده، ايه اللي حصل ؟ جبنا موسيماني وخد افريقيا مرتين ووصل النهائي للموسم التالت على التوالي وخد بطولات) ".

وأكمل الشاطر:" (لما حد يطرح عليك السؤال ده من فضلك رد عليه بهذا الشكل.. هو النادي الأهلي مشى موسيماني ؟ لأ يا افندم النادي الأهلي ممشاش موسيماني) ".

وواصل: "موسيماني هو من طلب ألأ يكون موجودًا في الفترة المقبلة، (والأهلي عمره ما يضرب حد على ايده، حضرتك مش عاوز تبقى موجود اتفضل يا افندم، شكرا جزيلا ليك بما لك من أخطاء) ".

وأردف:" (أنا بقى بقولها، أنا مش عاوز اتكلم في الأخطاء السابقة اللي وصلتنا لكده، لكن موسيماني له أخطاء وله حسنات كثيرة جدًا.. موسيماني سيظل كثيرا دائمًا في تاريخ الأهلي، لكن هل مالوش أخطاء ؟ لأ ليه اخطاء) ".

وأتم إسلام الشاطر:" (أنا شخصيًا بشوف موسيماني واحد من أفضل المدربين اللي مروا على الأهلي، ولكن في نفس الوقت له أخطاء يعرفها كل الناس) ".

وكان النادي الأهلي قد أعلن في منتصف شهر يونيو الماضي فسخ التعاقد بالتراضي مع بيتسو موسيماني، وذلك بعدما طلب المدرب الجنوب إفريقي الرحيل رغم محاولات الإدارة للإبقاء عليه، وفقًا لما جاء في البيان الرسمي.