علق شريف إكرامي حارس مرمى نادي بيراميدز على هجوم جماهير النادي الأهلي ضده في مباراة الفريقين الأخيرة ببطولة الدوري.
وقال إكرامي في تصريحات تلفزيونية أمس عبر شاشة إم بي سي مصر "لما مشيت من الأهلي في لعيبة كتير لما بيكون في حاجة جماهيرية ضدها او موجهة أو لاي سبب بتقف السوشيال ميديا وتبتعد".
وتابع "لكن انا سايب كل حاجة زي ما هي، مش علشان انا مش فارق معايا، في جزء جوايا اني مقتنع ان الجمهور واصله بشكل معينه انه يكون زعلان او غضبان".
وأضاف "تمام الجمهور ده ياما شجعني فـ مستحيل اني فجأة اخد موقف، زي ما حصل في مباراة الأهلي وبيراميدز الأخيرة هتفوا ضدي وقولتلهم انتم فوق راسي، قلت للجماهير انتوا فوق راسي، الجمهور ده ياما شجعني، مفيش مشكلة لو في مرحلة ما جزء من الجمهور واصله حاجة بشكل ما".
وواصل "جمهور الأهلي هتفوا ضدنا بكلام عام في الاول وبعدين قالوا الولا ولا اهو خرم افريقيا اهو، اكيد زعلت لإن دول جمهور النادي بتاعي الي قعد سنين يشجعني، ولكني كنت متوقع ان هيحصل شيء في المدرجات، كنت مديهم عذر للي هم عملوه".
وأردف إكرامي في تصريحاته "لما اتقال عليا لو اتشاطت عليا تلاجة هتدخل جول ده عادي بيحصل، اكيد مش بكون فرحان، اكيد بتأثر لاني مش انسان آلي، لكن انا اتقالي وحش افريقيا والقاب كتير بكون فرحان بيها وقتها، طبيعي اتقبل النقد والإشادة".
مختتمًا تصريحاته "لازم تقبل النقد الي هو الجزء القاسي والوجه القبيح لكرة القدم ولازم تقبله، لانك هتقبل الجزء الحلو والمشرق والانجازات الي حققتها وشهرة والقاب وفلوس في النادي الأهلي، انا اسمي وتاريخي والنجومية كانت في الأهلي وأيامي الحلوة في الأهلي".