وجه عدلي القيعي، مستشار لجنة التعاقدات والتسويق السابق بالأهلي انتقادًا لاذعًا لبيتسو موسيماني، المدير الفني للمارد الأحمر، بعد الهزيمة أمام سموحة في كأس الرابطة.

وقال القيعي في تصريحات عبر برنامجه ملك وكتابة على شاشة قناة الأهلي:" (متحطش العربية قصاد الحصان. الأمور لما تبقى طبيعية يحصل الأداء وتوصل للأهداف والنتائج.. ما يحدث على الساحة الرياضية هو إننا لابسين الشمال في اليمين، زي المنتخب) ".

وأضاف:" (كنت متخوف من فكرة اقعدوا كلكم وتعالوا كلكم . الناشئين اللي اتهرسوا وفي قمة حماسهم وكل ماتش احسن من التاني . فجأة اقعدوا كلكم . ليه نبتدي كلنا وليه نقعد كلنا ؟ خوفت من دي جدًا) ".

وتابع:" (آخر مباراة لعبناها بالفريق الأول كانت يوم 26 ديسمبر.  بعدها 12 يوم اجازة . اكتشفت ان القائمة اللي انت مسجلها في مونديال الاندية مش معانا لمدة 12 يوم . اجازة وراحة كاملة وبعضهم رجع عندهم كورونا وخدوا راحة تاني) ".

وأكمل:" (استغربت من الشحات وياسر وافشة واحمد عبد القادر. كانوا لازم يدخلوا مع الشباب في المباريات السابقة عشان نشيل بعض.. انا بشيلك بالخبرة وانت بتشيلني بالمجهود) ".

وواصل:" (اللعب بفكرة العربية قصاد الحصان . اجيب طاهر ألاعبه باك يمين ؟ أنا بحب أحط نفسي مكان اللاعب . طاهر عشان يتعود على المكان ده لازم ياخد وقت . لو انت بتجربه من أول البطولة كنت اعرف ينفع ولا لأ) ".

وأكمل:" (أنا معاك البطولة دي استثمرها عشان اشوف هعمل ايه في كأس العالم للأندية. بس كل مباراة ليها قيمتها . المدرب المفروض أدرى واحد بفرقته . المفروض يكون عارف ان الايام الجاية كافيين إنه يعدل المايلة) ".

وأتم القيعي تصريحاته قائلًا:" (اللاعيبة كانت محتاجة راحة آه بس هل بالطريقة دي ؟ هو نفسه بيقول أجدد عقدي ولا ... لأ المواضيع دي يجب تنتهي فورًا . أكتر ناس سعادة بالتشكيل النهاردة هو أحمد سامي، المدير الفني لسموحة) ".