قال حازم إمام نجم الزمالك السابق بن المدربين الأجانب يأتون للتدريب في مصر من أجل كسب الأموال فقط والبحث عن فرصة سريعة للتدريب وهو ما حدث مع كارتيرون.
وأوضح حازم إمام في تصريحات عبر إذاعة اون سبورت اف ام: "مبشوفش الحاجات دي في العالم، بتعمل عقد مع مدرب محترم وتعمل شرط جزائي يروح فجأة سايبلك الشرط الجزائي وماشي".
وأضاف: "الناس دي بتيجي عندنا تاكل عيش ويشتهروا قبل ما يبقوا جايين بيبقوا أشباح، مش لازم كارتيرون، محدش عارفهم أوي، الأجانب معظمهم بيبقوا ناس عادية محدش عارفهم سواء أهلي أو زمالك، وياخدوا صيت وفجأة تلاقيهم راحوا، يلفوا لفة الخليج وشمال أفريقيا من خلالك انت دايما انت اللي بتعرف الناس دي على الوطن العربي، ياخدوك محطة ياخدوك سلم مش في دماغه نادي في دماغه يلم فلوس واسم كويس وخلاص".
وتابع حازم إمام: "بشوف كده، آن الأوان نركز في المدربين المصريين ونصرف فيهم كويس في تعليمهم في التدريب دول عندهم أصل مش هيعمل الحرطة دي مش هيسيبك في وسط الموسم لما بيمشوا ومبياخدوش نص عقودهم المدرب المصري ناجح في الدوري المصري وعندكم إيهاب جلال مثال ودايما باصين للمصري انه ضايع ومعندوش فكرة غير الأجنبي نديله الأعذار لما يغلط".
واختتم حازم إمام تصريحاته: "المدرب الأجنبي بدون أي حاجة يسيبك ويمشي المكان مش مرتبط بيه معندوش علاقات إنسانية ، شوفنا لعيبة كورة كتير بتضحي زي توتي اسطورة روما توتي بكل تاريخه بطولتين دوري ممكن تلاقي ياكوينتا بطولاته أكتر".