أكد خالد جلال، المدير الفني لفريق غزل المحلة، أن فريقه كان قريبًا من تحقيق الفوز على الزمالك، مشيرًا إلى أن الهدف قبل المباراة كان حصد النقاط الثلاث وليس الاكتفاء بالتعادل.

وقال خالد جلال، خلال مداخلة هاتفية ببرنامج «اللعيب» المذاع عبر قناة«MBC مصر»: «هرد لك على التلات نقاط النهاردة، مش هرد لك مثلًا إننا ناخد نقطة، لا هرد لك التلات نقاط».

وأضاف: «أنا مش عارف أوصف شعوري النهاردة، لأن طبعًا أول مباراة ليا مع غزل المحلة، فكانت بالنسبة لي صعبة جدًا، ونفسي إني أحقق نتيجة أسعد بها جمهور المحلة».

وتابع: «عملنا مباراة كبيرة جدًا النهاردة، ويمكن إحنا كنا الأقرب للفوز، واتكلمت مع اللاعبين قبل المباراة وقلت لهم إنها مباراة مهمة».

وأوضح المدير الفني لغزل المحلة: «الطريقة اللي لعبنا بها النهاردة خلقت فرصًا كثيرة للمحلة، ولو أقولك إن الفرص اللي ضاعت النهاردة من عبد يحيى بس 3 فرص، وسعيدو العرفاوي كان عنده فرص، لكن في الحقيقة لم نوفق في إنهاء الفرص».

وأكمل: «قلت لهم خلي بالكم إننا بنلعب مع الزمالك، لأن فيه ناس بتعرف تخلص الفرص اللي إحنا بنضيعها، وصعب إنك تضيع قدام نادي الزمالك 7 فرص، يعني كتير».

وعن حديثه عقب المباراة عن وجود أمور غير طبيعية، قال خالد جلال: «كمية التغييرات الاضطرارية اللي حصلت النهاردة مش طبيعية، من أول ما بدأت التدريب لغاية دلوقتي ما حصلتش معايا».

وكشف: «العرفاوي في آخر كرة في الشوط الأول جاله شد في الخلفية، وغيرت محمد أشرف، وده التغيير الوحيد اللي عملته باختياري، وكنت عايز أدعم الفريق بجناح سريع».

وأردف: «في الشوط الثاني 3 لاعبين جالهم كرامب، شوشة ويحيى زكريا وتوريس، وسعيدو خرج مصاب، فالتغييرات كلها كانت اضطرارية وأثرت على الفريق والمباراة».

وعن رأيه في عدم احتساب ركلتي جزاء خلال المباراة، قال خالد جلال: «في ناس كتيرة جدًا بعد المباراة قالت إن لنا ضربتي جزاء، مش ضربة واحدة، لكن أنا وأنا جوه الملعب ما أقدرش أحكم بصراحة».