كشف زيكو، خلال ظهوره مع الإعلامي عمرو أديب على قناةMBC مصر، عن كواليس صعبة عاشها في بداية مشواره، مؤكدًا أن دعاء والديه كان السر الحقيقي وراء نجاحه.

وقال زيكو: "رضا الأب والأم هو سر النجاح في الحياة، مفيش أسرار تانية. أنا مهما حكيتلك، الموضوع صعب، كنت بنام في الشارع، وأصحى أروح الجامعة أستحمى، وبعدها أروح التمرين، وأرجع أكمل شغلي، وساعات كنت أروح البيت أغير هدومي وأرجع الشارع تاني."

وأضاف: "الناس فاكرة إن الموضوع سهل، لكن الرحلة من واحد بينام في الشارع لحد ما يلعب في أكبر استاد في أمريكا ومش يحس برهبة قدام ميسي، كانت رحلة صعبة جدًا."

وتابع: "كان بيعدي علينا أيام مكنش معانا فلوس ناكل، وكنا بنبيع هدومنا عشان نجيب أكل للبيت، ونستلف من هنا ومن هنا عشان نعرف نعيش."

واستكمل: "بعد الثورة اتشالت المناطق العشوائية، ومبقاش عندنا مصدر دخل، فبقينا أنا وأخويا معتمدين على مرتبات الكورة. أنا كنت باخد حوالي 800 جنيه، وهو حوالي 2500 جنيه، وكنا بناكل ونشرب ونسدد الديون اللي كانت علينا، واللي وصلت لحوالي 100 ألف جنيه."