تحدث محمود عبد الرازق شيكابالا قائد الزمالك، عن حقيقة ارتباط اسم المهاجم الأردني يزن النعيمات بالقلعة البيضاء، مؤكدًا أن اللاعب كان قريبًا بالفعل من الانضمام قبل أن تتعطل الأمور بشكل مفاجئ.

وقال شيكابالا في تصريحاته خلال ظهوره مع الإعلامي إبراهيم فايق، إن النعيمات كان ضمن حسابات الزمالك قائلاً: "طبعا كان جاي، وميدو كان بيتكلم معاه، والأمور كانت شبه محسومة، بس فجأة زي اللي بيحصل اليومين دول كل حاجة وقفت."

وأضاف: "بقالنا فترة أي حد بيرتبط اسمه بالزمالك فجأة ما بنلاقيهوش. أنا ما بحبش الكلام الكتير، أنا بحب اللعيب يبقى لابس تيشيرت الزمالك. مش نقول هنجيب لعب واثنين وفجأة ما نلاقيش حد. أنا عايز فعل مش كلام."

وأعرب قائد الزمالك عن حزنه الشديد مما يمر به النادي في الفترة الأخيرة قائلاً: إبراهيم، أنا زعلان ومتضايق للي بيحصل في نادي الزمالك. نادي كبير ماينفعش نسيبه كده. كل يوم لعيبة بتقدم إنذار لفسخ التعاقد، وقبلهم ناس مشيت أو فسخت. هل ده طبيعي؟".

وتابع: "أنا لعبت في الزمالك سنين كتير وفي أسوأ الفترات، بس ما وصلناش للمرحلة دي. الوضع صعب جدًا."

ووجه شيكابالا رسالة مباشرة لمجلس الإدارة قائلاً: "لو أنتم مش قد جمهور الزمالك ولا طلبات النادي، امشوا. أنا بقول لكم من هنا، امشوا. لأن أنتم هتوصلونا لفين؟ الجمهور أدّاكم دعم كبير جدًا بس مفيش حاجة بتتغير."

واختتم حديثه بالتأكيد على أن ما يحدث داخل النادي يحتاج إلى تدخل سريع وحلول حقيقية قبل أن تتفاقم الأزمة أكثر.