تغلب فريق بيراميدز على نظيره الزمالك بثلاثية نظيفة وذلك ضمن منافسات الجولة الحادية عشرة من الدوري الممتاز.
وقال محمد صبري لاعب الزمالك الأسبق في تصريحات بعد المباراة: "عاوز أعتذر لجماهير نادي الزمالك على المنظر اللي شافوه انهارده من لاعيبة الزمالك بعتذر وبقولهم انتم عملتوا اللي عليكوا وزيادة".
وتابع: "فريق بحجم الزمالك يدخل فيه 3 اهداف في شوط واحد ومن أخطاء ساذجة بصراحة اللي حصل ده كارثة، وانا بسأل اللاعيبة ايه المبرر، احنا كنا بنجيب شماعات واللاعيبة مش بتخود مستحقات واللاعبية مظلومة".
وأضاف: "احنا امبارح جبنا المسؤولين وقالوا انهم ادوا للاعيبة المستحقات وكله تمام، اللاعيبة انهارده دخل فيها اجوال بسذاجة المفروض اشوف انفعال من اللاعيبة في الملعب وده محصلش انهارده".
وأكد: "حضرتك بتلعب الزمالك وانهارده مش بتكلم عشان المباراة عشان أقدر اعوض الـ3 نقاط انما اللي حصل ميديناش امل في اي حاجة، واللى مش حاسس بقيمة الزمالك لازم يعالج نفسه انتوا لابسين تيشرت كبير اوي اوي".
واختتم: "مش بتكلم عن الخسارة، جمهور الزمالك مش بيهموا مكسب او خسارة بس لازم يشوف اللاعيبة تأدي اللي عليها، بالمنظر ده انت بتضر نفسك كلاعيب وهتندم بكرة لو لاقيت نفسك برة الزمالك وبقولك الكلام ده عشان انا مثلت النادي في فترة من الفترات".