تحدث لاعب فريق كرة القدم بالنادي الأهلي كريم فؤاد عن إصابته القوية بقطع في الرباط الصليبي خلال مباراة سموحة في بطولة الدوري المصري الممتاز.
وقال كريم فؤاد عبر حسابه على الفيس بوك: كل خسارة دُونَ الجنة ، فهي دُون، اللهم لك الحمد كما ينبغي لجلال وجهك وعظيم سلطانك ، الدنيا دار إبتلاء وشقاء ودايماً الإبتلاء بيجي للشخص في الحاجة اللي هو بيحبها ونِفسه فيها وطموحه وسعادته فيها ، ودا بيكون إختبار ليك هتعمل ايه في الموقف دا ، وان الإختبار والبلاء دة بيكون ليه أجر كبير ورفع درجات في الجنة وتكفير ذنوب وحاجات كتير عظيمه اوي مقابل اني اصبر على الإبتلاء دة.
وتابع: انا كان مكتوبلي اصابة في الرباط الصليبي للمره التانيه ، بس عندي احساس تاني خالص مع الإختبار دا ، ان انا في نعمة كبيرة اوي وان الحمدلله ربنا رزقني بإختبار سهل وهين أوي مقابل إبتلاءات ناس تانيه اصعب من دا بكتير ، وكمان إختبار مش جديد عليا بَعيده للمرة التانية في وقت قصير ف هعرف اتعامل معاه بشكل كويس ويمكن احسن.
وأضاف: عشان كدا بحمد ربنا ان الإبتلاء اللي هاخد عليه اجر كبير وعظيم مش بالصعوبة القاسية اللي توجعني وتهدّني، انا بحمد ربنا وراضي ومؤمن جداً إن ربنا بيحبنا نقرب منه بالعبادات اللي منها الصبر والدعاء.
واختتم: الحمدلله مستعد للإختبار ومتحمس، شوية وقت وهنرجع نحارب من تاني، أشوفكم على خير قريب.