كشف عصام الحضري حارس مرمى منتخب مصر السابق، كواليس إبلاغه أحمد ناجي مدرب حراس مرمى منتخب مصر السابق ترتيبه بين حراس المنتخب قبل بطولة كأس أمم إفريقيا 2017.

وقال الحضري: "أنا كنت بتمرن كنا 4 حراس مرمى وواحد استبعد قبل المعسكر وكان مستر كوبر هو المدير الفني وده يمكن من المدرب الوحيد اللي معملتش معاه مشكلة كنت دايما بدخل في ناقشات مع المدربين وفي مشاكل بينا بس كنت بلعب".

وأضاف: "قبل البطولة بأسبوع أحمد ناجي جه قالي احنا كجهاز فني خدنا قرار أنك أنت الجول التالت وهو اللي واخد القرار من دماغه لو أنت مش عاوز تبقى الجول التالت قولنا من دلوقتي وخد شنطتك وروح".

وأكمل: "قولتله يعني انت شايفني مكسر الدنيا ولاعب أول ماتشين في تصفيات كاس العالم وتقولي كدة قالي احنا واخدين قرار حاجة آلهية خلتني أقوله توكل على الله ولو عاوزني أشيل الجزم والكور هشيلها".

واختتم الحضري حديثه: "قولتله توكل على الله والدمعة بتنزل من عينيا روحنا دخلنا الأوضة كنت بعيط بهيستيريا وبحسبن عليه قولت حسبي الله ونعم الوكيل فيك يا أحمد يا ناجي ويارب يبقى سامعني".