كشف أحمد شوبير الإعلامي بقنوات أون تايم سبورتس، كواليس غضب محمد صلاح نجم ليفربول الإنجليزي ولاعب منتخب مصر، من حسام حسن المدير الفني للمنتخب المصري.
وكان حسام حسن قد أعلن قائمة المحترفين المستدعاة للانضمام لمعسكر منتخب مصر المقبل، والتي شهدت تواجد محمد صلاح رغم إصابته.
وقال شوبير خلال حديثه عبر إذاعة أون سبورت: "الناس عارفة ان صلاح كان زعلان من بعض تصريحات كابتن حسام حسن قبل أن يتولى مسئولية تدريب المنتخب وده ليس غائبًا عن أحد.. صلاح بني آم حساس الحاجات دي بتزعله وبتضايقه".
وأضاف: "خلينا نحسبها العكس لو الجهاز الفني أعلن الأسماء من غير محمد صلاح هتلاقي قصة وحدوتة وصلاح نفسه هيكون زعلان ازاي اسمي برة منتخب مصر.. أنا شايف أن صلاح ملهاش لازمة يلعب الدورة الودية وسلامته أهم".
وأكمل: "صلاح واخد على خاطره وماله نطيب خاطره حسام حاول يوضح في المؤتمر الصحفي قدر الإمكان يمكن الرسالة موصلتش بشكل جيد لمحمد صلاح أعتقد أن اتحاد الكرة لابد أن يكون له دور وليس هناك ما يمنع أن يكون للدكتور أشرف صبحي وزير الشباب والرياضة يكون له دور وأنا عارف أنه صاحب اقتراح أنه يسافر ويقابل الناس هناك وتخلص القصة بالهدوء".
وواصل: "على فكرة مش عيب أبدا يكون في خلاف في وجهات النظر بين لاعب ومدرب ومش عيب أبدا أننا نقرب وجهات النظر لأنه هي لازم تخلص لأن حسام حسن خلاص هو مدرب منتخب مصر وصلاح جواه حتة من قبل خالص ما حسام يكون مدرب المنتخب من الهجوم اللي حصل عليه فكان زعلان وكان متضايق وده حقك لكن في النهاية لازم من التدخل العاقل والحكيم لهذا الأمر".
واختتم شوبير حديثه: "مفيش ما يمنع أن الدكتور أشرف يجيب كابتن حسام وهو اللي يجري الاتصال وهو اللي يخليهم يتكلموا مع بعض لأن ده ضروري لا غنى لحسام عن صلاح ولا غنى لصلاح عن منتخب مصر احنا محتاجين الاتنين نحاول قدر الإمكان نكون وصلة خير بلاش فكرة أننا نسخن الدنيا القصة محتاجة حالة من الهدوء والعقلانية".