أدلى عمرو أديب مقدم البرامج في قناة ام بي سي مصر بتصريحات تلفزيونية يعلق فيها على رباعية الأهلي في الزمالك في إطار بطولة الدوري العام.
وقال أديب: "ايه الفانلة الي كلها ترتر وخرج النجف دي فين فانلة الزمالك البيضا الأبيض أبو خطين" "الفانلة الزرقا دي الوهم اللي حصل ان احنا لو لبسنا الفانلة الزرقا هنخلي الدنيا زرقا أهي ازرقت على دماغنا كلنا امبارح".
وأضاف: "كلها نجوم كده دي مش فانلة رجالة يا جماعة فين الفانلة البيضا بتاعتنا انت منزل اللعيبة لا انتماء ولا احساس والماتش خلص في دكر في النادي فتح بقه؟".
وأكمل: "مكانش في فرقة ولا احساس ومش قابضة اللعيب بتشوف الكباري اللي بتنعمل لعيبة بتروح فرق تانيه وحد يقبض سمسرة ويقبض عمولة لعيب محترم زي زيزو أنا افكر أنا قاعد ليه".
وواصل: "الزمالك بقت خناقة لأي لعيب انك هتتشتم وهيتقال عليك مش عارف ايه وطبعا خبطة إمام عاشور معلمة في النادي كله هو ده نادي بجد هو دي لعيبة بجد أنا لو مكان اي لاعب هوقع لأي نادي بيراميدز أو فيوتشر أو زد علشان أحس اني بلعب في نادي طبيعي مش هتشتم ولا هتهزأ ولا انت جيت بشبشب".
وشدد: "لا احترام ولا تقدير ولا أي حاجة طب أنا جيت بشبشب مش عايز أكمل .. احنا متسابين للسقوط الحر النادي بيقع .. غيروا الفانلة دي هاتولنا فانلة رجالة".
واختتم: "عزائي الوحيد أنه خلاص إكرام الميت دفنه انت متوقع ايه؟ في حد بيشجع الزمالك مستني حاجه من الزمالك؟ حد عايز حاجه يعني؟".