كشف أحمد شوبير الإعلامي بقنوات أون تايم سبورتس، عن قرار منتظر من لجنة الحكام اليوم الخميس، بشأن وليد عبد الرازق حكم مباراة الزمالك وبروكسي في دور الـ 32 بكأس مصر.

وكان الحكم وليد عبد الرازق قد ارتكب عدة أخطاء في مباراة الزمالك وبروكسي، حيث تجاهل احتساب ركلتي جزاء لصالح الفريق الناشط في دوري الدرجة الثانية، منهما واحدة في الدقائق الأخيرة من عمر المباراة.

وقال شوبير خلال حديثه عبر إذاعة أون سبورت: "في كلام طلع بعد الماتش إيقاف وليد عبد الرازق شهر، وعن نية لجنة الحكام بإيقافه، لكن لحد دلوقتي مفيش حاجة رسمي طلعت من لجنة الحكام".

وأضاف: "ممكن يتم إيقافه، اللجان ماشية بمبدأ الثواب والعقاب لكن محدش فينا عرف قرار رسمي، في مبدأ داخل اللجنة لما بتكون في أخطاء بيتم استبعاد الحكم لفترة مفيش غرامات مالية ولا حاجة بس مش بيحكم في الدوري الممتاز ممكن ينزل يحكم في الماتشات الأقل مستوى".

وأكمل: "مفيش قرارات معلنة حتى الآن، اللجنة تعقد اجتماعها انهاردة الخميس وهيتاخد قرار، يعني وليد عبد الرازق هيتوقف؟ اه بقولك هيتوقف بس قد ايه يوم شهر سنة حسب ما تهدى الجراح وتنام لكن القرار مصدرش كل اللي طلع مجرد اجتهادات".

وأتم شوبير حديثه: "وليد عبد الرازق حط على صفحته الشخصية ثقتي بالله وبنفسي تكفيني رد مهذب من وليد عبد الرازق.. المعلومة المؤكدة هيتم استبعاد وليد عبد الرازق من تحكيم عدد من المباريات لكن كام وامتى وفين وازاي مفيش حاجة ظهرت حتى هذه اللحظة".