علق عمرو أديب الإعلامي بمجموعة قنوات إم بي سي مصر على الهزيمة التي تلقاها الزمالك من البنك الأهلي بثلاثة أهداف دون رد في كأس الرابطة المصرية.
وقال عمرو أديب: "الزمالك اتغلب من البنك الأهلي 3-0، في عام 2023 الزمالك لعب 17 ماتش اتغلب في 10 رقم قياسي عالمي جديد لنادي الزمالك".
وأضاف: "احنا مش بنتكلم على فريق احنا بنتكلم على خرابة واللي مش مصدقني يبص للجول التاني امبارح يوريك حالة فرقة الزمالك "الخرابة" الكورة اتلعبت كأنها اترمت في خرابة اترمت ورا دفاع الزمالك اللي خرابة اللي مفيش فيه حد اللي محدش واقف فيه ولا حد قادر يجري ولا يعمل حاجة".
وأكمل: "كل لعيبة الزمالك وقفت اتفرجت عليه قالوا يااه احنا لسة هنجري وراك ما تروح انت هات الكورة اكتشفوا قبل الراية الركنية لأن الكورة بطيئة جدا جاب الكورة وراح خدها ولعبها وجاب جول 3 أجوال في 7 دقائق رقم قياسي عالمي جديد".
وأردف: "على فكرة الموضوع مش غريب هي اللعيبة دي انت طالب منها ايه؟ مفيش مدرب كل يوم ينزلوا التدريب يلاقوا حد جديد النادي الثاني الأكثر شعبية في مصر والعالم العربي نادي الزمالك المصري نادي البطولات معندوش مدرب اللعيبة مش بتقبض في مشاكل كتير رئيس النادي كان في السجن انت متوقع ايه من اللاعب ده؟".
واختتم عمرو أديب حديثه: "هما عرفوا ان مفيش افريقيا ولا دوري ولا رابطة هو نازل يلعب ليه الغرض انتهى معقول ده يتعمل في الزمالك؟ هل من الممكن ان يبقى في نادي الحياة بتاعته تبقى عاملة كدة؟ بيتعمل كدة ليه فينا؟ ليه بنتهان؟ احنا امبارح كنا بنتهان".