خرج حسام غالي عضو مجلس إدارة النادي الأهلي للرد لأول مرة على ارتباط اسمه برحيل الجنوب افريقي بيتسو موسيماني المدير الفني الأسبق للقلعة الحمراء.
وقال غالي في تصريحات عبر برنامج "مع نصوحي" اليوم الثلاثاء "موسيماني كان عقده قرب يخلص وهنجدد معاه وجددنا بالفعل، الناس أوقات كتير بتطلع اكاذيب وتمشي ورا سكريبت متوزع والناس تمشي بيه اهم حاجة تبقى عارف مين الي ورا الكلام ده".
وتابع "النادي له رئيس وهو الكابتن محمود الخطيب مفوض من المجلس لإدارة ملف الكرة في النادي، اختارني كنائب له في الملف ده وفي لجنة تخطيط فيها الكابتن زكريا ناصف و الكابتن محسن صالح، اي قرار بيخص الكرة بيعدي على الـ 4 دول وبيتناقش والاغلبية بيمشي قراره".
وتابع "لو الكابتن الخطيب شايف ان موسيماني يقعد والـ 3 يمشي هيمشي، هي ماشية كدة في النادي، مفيش شخص واحد هو الي يقرر وينفذ".
وواصل "كان في وقتها شركة كرة ولجنة كرة، قعدنا و الكابتن الخطيب قالي اقعد مع الراجل عاوزين نجدد معاه قبل ما نروح كاس العالم للاندية والموضوع اتاجل وراح ورجع وجددنا فعلا العقد".
وأضاف "بعدها طلع كلام انه يمشي ولا يقعد، قعدنا معاه 3 مرات وراح ماتش النهائي ورجع كان في مقابلة بينه وبين الكابتن الخطيب والأستاذ ياسين منصور هم الـ 3 دول بس".
وأردف غالي "طلع كلام وقتها اني كنت موجود واتخانقت معاه وانا اصلا مكنتش موجود في القعدة دي، دي الجلسة الي مشي فيها ومعرفش ابعادها ايه وايه الي حصل فيها".
وأستكمل "موسيماني جه من المطار بعد دورة المغرب قعد معاهم وعرفنا ان الراجل هيمشي والكابتن الخطيب قال ان الراجل هو الي طلب يمشي وانه تعبان ومش قادر من الضغوط".
واختتم غالي تصريحاته "جمهور الأهلي مش بيتقبل غير الفوز بس لو عملت ايه في الماضي وخسرت مفيش حاجة هتعدي، موسيماني قال أنا مش مستحمل الضغوطات دي وبناء عليه مشي، ولا اتخانقت معاه ولا كان قراري، ولا علشان محمد هاني، هو مشي ومحمد هاني قعد والموسم كمل".