علق ثروت سويلم عضو رابطة الأندية المصرية المحترفة على قيام مجموعة من جماهير النادي الإسماعيلي بالاعتداء على الحافلة الخاصة بجمهور الأهلي قبل المباراة التي جمعت ما بين الفريقين مساء أمس الأحد ضمن منافسات بطولة الدوري.
وقال ثروت سويلم خلال حديثه عبر إذاعة ميجا إف إم: "من أمن العقاب أساء الأدب.. اللي بيشيل كل الحاجات اللي بتحصل وزارة الداخلية بعد الأعباء المكلف بيها من تأمين داخل وخارج الاستاد تيجي ناس تكسر اتوبيسات غير مقبول معتقدش ان حد المفروض يتكلم عن الناس اللي اتقبض عليها وموقفهم ايه وهيطلعوا امتى".
وأضاف: "الطبطبة دي اللي وصلتنا للوضع اللي احنا فيه منين بنقول عاوزين نطور ونزود عدد الجماهير وملاعب وبنية تحتية والاقي واحد بيكسر أتوبيس، الموضوع صعب شوية فبالتالي لازم يكون في عقاب على نفس المستوى".
وأكمل: "بلوم على يحيى الكومي رئيس الإسماعيلي أنت انهاردة جايب اتوبيسات من نادي الإسماعيلي لازم كل اتوبيس يكون فيه مسئول ولازم يكون معاهم حوار ان مفيش خروج عن النص واحنا جايين ماتش كورة.. لو شوفت منظر اللي جايين معتقدش ان دول اختيارات نادي الاسماعيلي".
وأتم ثروت سويلم حديثه: "هناك اجتماع لرابطة الأندية يوم الأربعاء المقبل وسنقوم بمناقشة ما حدث مع عامر حسين المسئول عن المسابقات، لم نكن نتخيل أن يحدث خروج عن النص بعد التزام الجماهير في أغلب مباريات الموسم".