تحدث مرتضى منصور رئيس مجلس إدارة نادي الزمالك عن كواليس قرار عدم لعب ناديه مباراة الإسماعيلي غدًا السبت في بطولة الدوري الممتاز على ستاد الدفاع الجوي واستمرار الفريق على ستاد القاهرة.
وقال منصور في مقطع فيديو نشره على قناته الشخصية عبر يوتيوب: "نادي الزمالك من حقه يختار الملعب بتاعه.. اختيارنا في الأول كان بترو سبورت وستاد القاهرة، قالولنا هنلعب في ستاد القاهرة، من حقنا نطلب نغير ملعبنا زي ما الأهلي بيغير ملعبه.. الأهلي كان رافض يلعب في المغرب وعمل مشكلة مع الاتحاد الافريقي كله".
وأضاف: "قولنا عاوزين نلعب في الدفاع الجوي احنا بنفهم في الأصول، كلمت سالم الشمسي رئيس نادي بيراميدز اللي هما مأجرين الملعب من الدفاع الجوي، قولتله هل ممكن تسمحلنا أننا نلعب في الدفاع الجوي بقيت الموسم ونشترك معاك في دفع رسوم الملعب الموسم القادم، قالي أبو أحمد هذا ملعبك".
وأكمل: "بناءًا على ذلك ابتدينا نتحرك وبعتنا جواب للرابطة أننا عاوزين ننقل مباريات على ستاد الدفاع الجوي قال موصلنيش خطاب، وبعدها عمل مداخلة مع إحدى القنوات قال الكهربا قطعت، مشكورا السيد وزير الدفاع بناءا على لقاء حصل بالصدفة في مجلس الوزراء مع السيد وزير الشباب والرياضة والوزير المحترم اللي مش عاوز حد يذكر اسمه استأذنوه وكلم سيادة الفريق قائد الدفاع الجوي الراجل وافق والأمانة العامة للقوات المسحلة وافقت".
واستطرد: "اتفاجئنا عيل اسمه ممدوح عيد سمسار لعيبة قال ده كدة الأهلي هيزعل لو وافقنا راح مبلغ وقال احنا رافضين.. فمسئولين في الدولة بيحاولوا يحلوا المشكلة كلموني منهم وزير الشباب والرياضة قالولي تروح المقاولين العرب؟ قولتلهم معندناش مشكلة".
وأتم مرتضى منصور حديثه: "علشان بفهم في الأصول كلمت الوزير المحترم محسن صلاح قالي اديني ربع ساعة قالي الملعب في اصلاحات فمكانش في قدامنا غير ستاد القاهرة علشان ممدوح عيد يرتاح".