خالد بيومي يفتح النار على اتحاد الكرة وهاني أبو ريدة: ما يحدث تعنت ضد الأهلي وكأنه من دولة تانية



تحدث خالد بيومي المحلل الرياضي عن أزمة ملعب نهائي دوري أبطال أفريقيا والذي سيجمع ما بين النادي الأهلي والوداد المغربي يوم 30 مايو الجاري على ملعب مركب محمد الخامس بالدار البيضاء.

وقال خالد بيومي خلال حديثه عبر قناة أبو ظبي الرياضية: "الأهلي مازال وحيدًا، عمال يطلع بيانات علشان ياخد حقوقه اللي تخلى عنها اتحاد الكرة والناس الموجودين داخل الكاف والاتحاد الدولي اللي منهم هاني ابو ريدة".

وأضاف: "الموضوع ان اتحاد الكرة لم يتقدم بطلب تنظيم النهائي، اتحاد الكرة المغربي كان أقوى مننا فوزي لقجع أقوى مننا وأقوى من هاني أبو ريدة واتحاد الكرة في مصر بالكامل، العلاقات في المغرب اقوى من العلاقات في مصر مع الكاف وبالتالي كل هذا تحمله النادي الأهلي، ايه المشكلة انك تقدم طلب تنظيم مش هتأثر عليك في حاجة ادخل منافسة مع المغرب والسنغال على تنظيم النهائي".

وأكمل: "مصر كدولة وكامكانيات وطرف منافس في البطولة اللي هو النادي الأهلي وهو الوحيد اللي بيحافظ على شكل وهيبة الكرة المصرية بعد خروج المنتخب وجميع الأندية المصرية بالتالي انا كاتحاد المفروض اساعده واحافظ عليه، الأهم من كدة الاتحاد المغربي بيحاول جاهدا تأجيل مباراة الديربي بين الرجاء والوداد للحفاظ على فريق الوداد للفوز بدوري الابطال في مصر النادي الاهلي يتعامل وكأنه من دولة تانية".

وواصل: "الأهلي عاوز يأجل ماتش ايسترن كومباني واتحاد الكرة والرابطة يرفضوا ليه؟ ده تعنت ده أمر غريب جدا يؤخذ على مسئولي كرة القدم المصرية والمفروض وزير الرياضة يكون له دور، نادي فاضله خطوة انه ياخد افريقيا علشان يحفظ ماء وجه الكرة المصرية مش عاوزين يأجلوله المباريات".

واستطرد: "مفيش حرب بين الأهلي والاتحاد لكن هو تقصير الناس دي لا تصلح انها تدير الكرة في مصر، انا كنادي مصري بستند عليه طلع هش عندي رابطة الاندية بستند عليها تديني راحة قبل ماتش هيخليني اكسب بطولة قارية واروح بعدها العب كاس العالم للاندية وبرضوا طلعت هش".

وأردف: "في جزء تقصير من النادي الأهلي بس نسبته مش كبيرة لأنه مش هيفرض أو هيجبر الاتحاد أنه يقدم طلب تنظيم النهائي ده دور اتحاد ومسئول ووزير في مصر في 6 اشخاص بيديروا الكورة".

وأتم خالد بيومي حديثه: "المقارنة بين هاني ابو ريدة وفوزي لقجع.. لقجع بيعمل بكل قوته علشان يقف جنب دولته واندية دولته بيحفظ مكانه وقوته بالعلاقات الكبيرة جدا علشان يحفظ حقوق المملكة المغربية.. هاني ابو ريدة مستفدناش منه شئ بيعاند الكرة المصرية علشان هو مش رئيس الاتحاد وكأنه بيعاقب الكرة المصرية وهو مسئول عن جزء كبير من اللي بيحصل في كرة القدم في مصر".

استطلاع الراى


البطولات التي قد يحققها سواريش مع الأهلي في هذا الموسم؟
الدوري العام - 2022

الفيديوهات الأكثر مشاهدة خلال شهر