شن مرتضى منصور رئيس مجلس إدارة نادي الزمالك هجومًا على حازم إمام، وفاروق جعفر ثنائي الفريق الأبيض سابقًا، والمحللان بقنوات أون تايم سبورتس.

وقال مرتضى منصور خلال حديثه عبر قناة الشمس: "أقول لحازم إمام وفاروق جعفر كفاية تقطيع في ولاد النادي، يا ولاد النادي، كفاية تقطيع في بني آدم ماسك المهمة الفنية للفريق من 24 ساعة فقط، انتوا مش عاجبكم حاجة خالص؟".

وأضاف: "حازم إمام بيقول علي ماهر كان أحسن والزمالك كان معاه الحظ والتوفيق، مقولتش كدة ليه الماتش اللي فات لما 4 كور جت في العارضة، والماتش اللي قبله، وماتش سموحة الزمالك راكب الماتش من أوله لآخره، ويطلع الأخ اللي أسمه سامي يقولك شوفتوا العبقرية".

وتابع: "اعتبرنا طالعين من عملية جراحية، وبنتسند، وبنزق العيال، حازم إمام أنا عينته مدرب مع ميدو، وفاروق جعفر اتعين كذا مرة، معملتوش كدة ليه لما كنتوا موجودين معايا؟".

وأتم مرتضى منصور حديثه: "أبناء الزمالك اللي محتلين الاستوديوهات لو طايلين يولعوا فيا وفي اللعيبة والمدير الفني هيعملوا كدة، حد فيكم لما اتجمدت زعل؟ لا كله جري على اللجان.. طب لما خدت الحكم ورجعت حد قال مبروك لا.. طب لما اكتسحت وكسبت الانتخابات حد رفع سماعة التليفون وقال مبروك لا.. في غل".